Áıelder úı sharýasyna erlerden úsh ese kóp ýaqyt jumsaıdy
ASTANA. KAZINFORM - Qazaqstandyq áıelder úı sharýasyna erlerge qaraǵanda orta eseppen úsh ese kóp ýaqyt jumsaıdy. Bul týraly Mádenıet jáne aqparat mınıstrligi Kazinform agenttiginiń saýalyna bergen jaýabynda aıtylǵan.
Mınıstrlik Qazaqstandyq qoǵamdyq damý ınstıtýtynyń (QQDI) 2025 jylǵy «Qazaqstan qoǵamynyń túrli salalaryndaǵy genderlik stereotıpter týraly keshendi baıandamasynyń» derekterine silteme jasaıdy. Zertteý 2400 respondenttiń qatysýymen júrgizilgen.
– Zertteý nátıjeleri boıynsha, áıelderdiń 90%-dan astamy kún saıyn keminde bir saǵatyn úı sharýasyna arnaıdy. Sonymen qatar olardyń shamamen 80%-y turmystyq mindetterdi negizgi jumysymen qatar alyp júr. Al er azamattardyń 23%-dan 39%-ǵa deıingi bóligi úı sharýasyna múlde qatyspaýy múmkin, - delingen mınıstrlik jaýabynda.
Mádenıet jáne aqparat mınıstrligi mundaı júkteme áıelderdiń mansaptyq múmkindikterine áser etetinin atap ótti.
– Áıelderdiń tek jýrnalıstıka salasynda ǵana emes, jalpy eńbek naryǵyndaǵy mansaptyq ósýine aqy tólenbeıtin úı sharýasynyń kóp bolýy negizgi faktorlardyń biri bolyp otyr, – delingen vedomstvo jaýabynda.
Aıta keteıik, osyǵan deıin Astanada «UMAI» kásipker áıelder qaýymdastyǵynyń forýmy ótip, onda kásipker áıelder bıznesti damytý, jeke brend qalyptastyrý, qarjylyq derbestik jáne ómirdegi qıyndyqty eńserý jaıynda pikir bólisti.
