Áıelder úshin eń jaıly el belgili boldy

Sonymen saıasatker bolǵyń kelse, Rýandada ómir súr. Óıtkeni bul eldiń parlamentindegi 80 orynnyń 45-in názik jandylar ıelenedi eken. Jalpy Rýanda áıel-saıasatkerler sany basym  álemdegi jalǵyz memleket.

Ana bolǵyń kelse, Grekııada turǵan jaqsy. Sebebi bala týý barysyndaǵy ana ólimi 31800 oqıǵada bir ret qana tirkeledi.

Mansapqorlardyń tasy órge domalaıtyn jer - Taıland. Bul eldegi top-menedjerlerdiń 45 paıyzyn názik jandylar quraıdy.

Uzaq ómir súrgiń kelse, Japonııaǵa bet bur. Kúnshyǵys elinde áıelderge mansap jolynda ósýi qıyn bolǵanymen ómir súrý uzaqtyǵy 87 jasty quraıdy. Al bul kórsetkish Ońtústik Afrıkadaǵy Lesoto koroldiginde ne bári 48 jas qana.

Sportshylarǵa qamqorlyǵy zor el retinde AQSh atalyp otyr. Óıtkeni álemdegi eń joǵary jalaqy alatyn 10 sportshynyń 5-eýi AQSh azamatshasy.

Qazaq «balaly úı - bazar, balasyz úı - qý mazar» dep, balaly úıdiń qýanyshy da, shattyǵy da kóp bolady deıdi. Qyzyǵy, balaly bolýdan bastartqan áıelderge de óte jaıly oryn bar eken. Ol - Shvetsııa. Shvetsııada túsik tastatsań betińe salyq qylmaq túgili, tipti 18 aptalyq júktilik merziminde de sharanany alyp tastaýǵa ruqsat beredi.

Joǵary bilikti áıelderge ıAmaıka eli jaıly. Osynaý tańǵajaıyp araldaǵy joǵary bilikti qyzmetkerlerge arnalǵan oryndardyń 60 paıyzyn áıelder ıelik etedi.

Shyǵarmashylyqqa boı urǵan áıelderge Shvetsııanyń qamqorlyǵy zor. El úkimetiniń qaýlysyna sáıkes, kıno túsirýge arnalǵan granttar áıelder men erkekterge teń bólinip beriledi.

Saýatty bolǵyń kelse, Lesotoda ómir súr. Bul eldegi áıelderdiń ómir súrý uzaqtyǵy tómen bolǵanymen,  saýattylyǵy jaǵynan 95 paıyzdyq kórsetkishpen kósh bastap tur. Bir qyzyǵy jergilikti er-azamattardyń saýattylyǵy tómen, olardyń 83 paıyzy ǵana oqyp, jaza alady.

Al  áıelderdiń tynys-tirshiligine naǵyz jaıly el - Islandııa. Jergilikti áıelderdiń saıası belsendiligin, olardyń bilimdiligin, densaýlyǵyn jáne mansaptyq bolashaǵyn saraptaǵan  The Independent basylymy Islandııany hanymdar úshin qazirgi zamanǵy jumaq dep atapty.