Astanada 600-ge jýyq qurylys kompanııasy zań buzǵan — Jeńis Qasymbek
ASTANA. KAZINFORM — Astana ákimi Jeńis Qasymbek Instagram paraqshasynda qurylys kompanııalaryna qoıylatyn talaptar týraly jazdy. Bul týraly elorda ákimdiginiń resmı saıty jazdy.
— Elorda qarqyndy túrde damyp, halyq sany artyp keledi. Bul protseste qurylys mańyzdy ról atqarady. Qaladaǵy qurylys kompanııalarynyń ókilderimen kezdesýde ózekti máseleler men birlesken jumystyń basymdyqtaryn talqyladyq. Jıynǵa sondaı-aq qalalyq prokýratýranyń, polıtsııa men memlekettik organdardyń jáne t. b. ókilderi qatysty. Qalanyń damýynda mańyzdy aspekti — qurylys kompanııalarynyń turǵyn úılerdi sapaly ári zańdy túrde salýy. Degenmen, ony bári birdeı ustana bermeıdi. Máselen, ótken jyly 431 jospardan tys tekserý júrgizilip, 600-ge jýyq zań buzylǵany anyqtaldy. Alty kompanııa qurylys lıtsenzııasynan aıyryldy, sol sııaqty zań men qurylys normalaryn buzǵany úshin 180-nen astam talap-aryz sotqa joldandy. Jerge qatysty tıisti qujat almaı qurylysy bastalǵan tórt nysan sot sheshimimen buzyldy. Atalǵan jumystyń barlyǵy bıyl da jalǵasyp jatyr, — dep jazdy qala ákimi.
Jeńis Qasymbek qurylys kompanııalary qoldanystaǵy zańnamanyń normalaryn qatań saqtaýy tıis ekenin aıtqan.
— Qurylys-montajdaý jumysy tek qurylys normalary men standarttaryna sáıkes júrgizilýi qajet. Sondaı-aq, qurylys júrgizý jáne montajdaý barysynda oryndalatyn jumystardyń arnaıy bekitilgen jobalyq qujattama men standarttarǵa sáıkestigin únemi tekserip otyrý qajet. Jaýapty tulǵalar oryndalatyn operatsııalardyń qaýipsizdik talaptaryna tolyqtaı sáıkestigin qadaǵalaı otyryp, materıaldardyń sapasy men tehnologııalarǵa sáıkestigin baqylaýy kerek. Energııanyń tıimdiligine, sondaı-aq ekologııalyq tazalyqqa, onyń ishinde qurylys qoqystaryn shyǵarýǵa qatysty standarttardy saqtaýǵa erekshe nazar aýdarý qajet. Qoqysty arnaıy jabdyqtalǵan polıgonǵa shyǵarý kerek. Ony ruqsat etilmegen oryndarǵa tógip, sol arqyly qorshaǵan orta men elordanyń kelbetine zııan keltirýge bolmaıdy. Zań buzý oqıǵalary anyqtalǵan jaǵdaıda qurylys kompanııalary jaýapkershilikke tartylady, onyń ishinde aıyppul salý, qyzmetin toqtatý jáne zańsyz salynǵan nysandardy buzý máseleleri qarastyrylǵan, — dep jazdy Jeńis Qasymbek.
Eske sala keteıik, buǵan deıin Jeńis Qasymbek astanadaǵy keptelisti kóp kópir salý arqyly sheshetinin aıtqan bolatyn.