Áıelder merekesine oraı Astanada «Aqqý kóli» baleti sahnalanady
ASTANA. QazAqparat - «Astana Opera» teatrynda alǵash ret balet trýppasynyń kórkemdik jetekshisi Altynaı Asylmuratovanyń jańa horeografııalyq redaktsııasyndaǵy P.Chaıkovskııdiń «Aqqý kóli» spektakli sahnalanady, dep habarlaıdy QazAqparat.
Teatrdyń baspasóz qyzmetinen málim etkendeı, «Astana Opera» trýppasynyń oryndaýyndaǵy «Aqqý kóli» spektakliniń jańa redaktsııadaǵy premerasy Maskatqa (Oman, 2017) gastrolder aıasynda Koroldik opera teatrynda ótken. Sheteldik kórermen trýppanyń ónerin joǵary baǵalap, tolassyz shapalaq soqqan.
«Aqqý kóli» baletinsiz mýzykalyq teatrdy elestetý múmkin emes.
«Ómir eshqashan bir tústi bolǵan emes, árqashan túrli reńkke ıe, ómirde adaldyq pen mahabbat ta, satqyndyq pen zulymdyq ta kezdesedi. Bul balette barlyǵy kórinis tapqan: Odetta - aqqý, tazalyqtyń, náziktiktiń nyshany, bul lırıkalyq beıne. Odıllııa bolsa, kerisinshe, kereǵar, zulym, eliktirgish, esepshil, sonymen qatar kórikti de. Kórermen tazalyq pen jaýyzdyq, mahabbat pen satqyndyq kúresiniń kýási bolady. Degenmen sońynda mahabbat jeńiske jetip, bári sátti aıaqtalady. Biz biraz ózgerister engizdik, alaıda L.Ivanov - M.Petıpanyń kanondyq qoıylymyn saqtap qaldyq. «Aqqý kóli» - klassıkalyq balettiń nyshany, álemdik brend. P.I.Chaıkovskııdiń mýzykasy - biz úshin úlken mura. Bul balet máńgi, ony bizge deıingiler de kórgen jáne oǵan bizdiń urpaǵymyz da tamsanatyn bolady», - dedi «Astana Opera» balet trýppasynyń kórkemdik jetekshisi Altynaı Asylmuratova.
Bas partııalardy ár kúnderi «Astana Operanyń» ártisteri oryndaıdy. Odetta - Odıllııa - Qazaqstannyń eńbek sińirgen qaıratkerleri, «Astana Operanyń» jetekshi solısteri Áıgerim Beketaeva, Mádına Basbaeva, Zıgfrıd - kóptegen halyqaralyq baıqaýlardyń laýreattary Oljas Tarlanov, Erkin Rahmatollaev, Rotbart - Jánibek Imanqulov, halyqaralyq baıqaýlardyń laýreaty Arman Orazov, Saıqymazaq - halyqaralyq baıqaýlardyń laýreattary Baqtııar Adamjan, Serik Naqyspekov. 
«Astana Opera» sımfonııalyq orkestri, dırıjer - Arman Orazǵalıev.
Balettiń qoıylymy 8, 10 jáne 17 naýryz kúnderi ótedi.
