Áıelder men qyzdarǵa qatysty zorlyq-zombylyq kórsetý máselesi epıdemııa aýqymyna deıin ósti - ıÝNIFEM ókili D. Sartbaeva
ALMATY. 25 qarasha. QazAqparat /Názıra Eleýhan/ - Qazaqstanda áıelder men qyzdarǵa qatysty zorlyq-zombylyq kórsetý máselesi epıdemııa aýqymyna deıin ósti.
Bul týraly búgin Almatyda ótken baspasóz máslıhatynda BUU Áıelder qorynyń (ıÝNIFEM) TMD elderindegi baǵdarlamalarynyń óńirlik dırektory Damıra Sartbaeva málim etti. Búginde 15-44 jas aralyǵyndaǵy áıelder arasynda ólim men múgedektikke ákelýdiń basty saldary zorlyq-zombylyq, jábirleý bolyp otyr.
«Dúnıejúzilik banktiń júrgizgen zertteýlerine sáıkes osy top jıi ushyrasatyn qaýip-qaterdiń 10 túri ishinde zorlaý men turmystyq zorlyq-zombylyq reıtıngi jaǵynan qaýipti isik, joldaǵy apattardan joǵary tur. Qazaqstanda árbir onynshy adam turmystyq zorlyq-zombylyqtyń, sonyń ishinde - jynystyq, psıhologııalyq, fızıologııalyq jáne sońǵy kezderi ekonomıkalyq zorlyqtyń túrlerine shaldyǵýda», - dep atap ótti ol.
Onyń sózine qaraǵanda, zorlyq-zombylyqqa ushyraǵan áıelderdiń kópshiligi AQTQ (VICh) aýrýyn juqtyryp alý qaýpinde tur. «Máselen, jábir kórgen Ońtústik Afrıkanyń 1366 áıeliniń, jábirlenýge ushyramaǵan áıelderge qaraǵanda AQTQ aýrýyna ushyraý qaýpi 48 ese joǵary. Sonymen qatar turmystyq zombylyq kórýshi áıelder kompanııanyń óndiristik kórsetkishine de teris áser etýde.
Almaty qalasynyń ІІD-niń áıelderge qatysty zorlyq-zombylyqtan qorǵaý basqarmasynyń aǵa ınspektory Áıgerim Abylqasymovnyń aıtýynsha, áıelderge qatysty zorlyq-zombylyq boıynsha bıylǵy jyly 6 aıdyń ishinde 21 000 qylmystyq is tirkelgen. «2009 jyly 32 000-nan asa qylmystyq is tirkelgenin eskersek, bul keleńsiz jaıttyń etek jaıyp, taralyp jatqandyǵyn,kórsetedi», - dep atap ótti ol.
Qazaqstandaǵy «Daǵdarys ortalyǵynyń odaǵy» dırektory Zýlfııa Baısaqovanyń sózine qaraǵanda, jyl saıyn Qazaqstanda turmystyq zorlyq-zombylyqtan 500 áıel kóz jumýda. «Sondyqtan bıyl elimizde bul máseleniń aldyn alýǵa yqpal etetin, tuńǵysh ret áıelderge arnalǵan telefon jelisi ashyldy», dep habarlady ol.
Qazir osyndaı jaǵdaıǵa ushyraǵan áıelder men qyzdarǵa kómek kórsetetin 20 ortalyq bar. «Meniń oıymsha, ol az. Bizge jyl saıyn ártúrli kómek boıynsha 5000 adam habarlasady. Senim telefonyna 20 000 telefon qońyraýy kelip túsedi. Jyl saıyn 100 áıel men olardyń balalary ýaqytsha panalaý oryndaryna keledi», deıdi Zýlfııa Baısaqova.
Onyń pikirinshe, bul máseleni tıimdi sheshý úshin qoǵamnyń bul máselege qatysty pikirin ózgertý kerek jáne jedel túrde kómek kórsetetin jumys tetigin jasaý qajet.
