«Áıelder men erkekterdiń teń quqyqtary jáne birdeı múmkindikteri týraly» zań jobasyn Palata talqysyna shyǵarý usynyldy
ASTANA. Qarashanyń 13-i. QazAqparat /Aıdyn Báımen/ - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen Palata Bıýrosynyń kezekti otyrysy ótti,
dep habarlaıdy QazAqparat.
Bıýro otyrysynda Palatanyń salalyq komıtetteriniń usynysymen Májilistiń jalpy otyrysynyń kún tártibi jobasyna shyǵarylatyn zań jobalary saralandy. Atap aıtqanda, Qarjy jáne bıýdjet komıtetiniń usynysy boıynsha «Qazaqstan Respýblıkasynyń mıkroqarjylyq uıymdarynyń qyzmetin retteıtin keıbir zańnamalyq aktilerine ózgerister men tolyqtyrýlar engizý týraly» zań jobasymen jumysty jalǵastyrý máselesi qaraldy.
Ekonomıkalyq reforma jáne óńirlik damý komıteti «Memlekettik statıstıka týraly» zań jobasyn (jańa redaktsııasy) birinshi oqylymda qaraýdy usyndy. Sondaı-aq «Tutynýshylardyń quqyqtaryn qorǵaý týraly» jáne keıbir zańdarǵa qazaqstandyq qamtý máseleleri boıynsha túzetýler engizýdi kózdeıtin zań jobalary qaraldy.
Birikken Ulttar Uıymynyń (BUU) Jol qozǵalysy týraly jáne BUU-nyń Jol belgileri men sıgnaldary týraly konventsııasyn bekitý qajettigin Halyqaralyq ister, qorǵanys jáne qaýipsizdik komıteti usynyp otyr.
Áleýmettik-mádenı damý komıteti depýtattar talqysyna parlamentshiler bastamashylyq jasaǵan «Áıelder men erkekterdiń teń quqyqtary jáne birdeı múmkindikteri týraly» zań jobasyn shyǵarýdy usyndy. Sonymen qatar, «Bosqyndar týraly» jáne soǵan sáıkes keıbir zańnamalyq aktilerge ózgerister engizýdi kózdeıtin zań jobalary ekinshi oqylymǵa shyǵarýǵa daıyn.
«Qazaqstan Respýblıkasynyń keıbir zańnamalyq aktilerine qyzmeti úshinshi tulǵalarǵa zııan keltirý qaýpimen baılanysty obektiler ıeleriniń azamattyq-quqyqtyq jaýapkershiligin saqtandyrý máseleleri boıynsha ózgerister men tolyqtyrýlar engizý týraly» zań jobasy ekinshi oqylymǵa shyǵarylatynyn Ekologııa máseleleri jáne tabıǵat paıdalaný komıteti habarlady.
Jalpy otyrysta «2010-2012 jyldarǵa arnalǵan respýblıkalyq bıýdjet týraly» úkimettik zań jobaǵa Parlament Senaty engizgen túzetýler talqyǵa salynatyn boldy. Sol sekildi kún tártibi jobasyna depýtattardyń saılaýshylarmen kezdesý úshin óńirlerge barýy týraly másele engiziletin boldy.
