Áıelder memleket tarapynan qoldaýdy sezinýi tıis — depýtat
PAVLODAR. KAZINFORM – Májilis depýtaty, Jalpyulttyq sotsıal-demokratııalyq partııasy fraktsııasynyń múshesi Ajar Saǵandyqova Pavlodar oblysyna jumys saparymen bardy.
Onda Pavlodar qalalyq jumyspen qamtýdy úılestirý jáne áleýmettik baǵdarlamalar bóliminiń «Daǵdarys ortalyǵy» memlekettik mekemesiniń qyzmetimen tanysty.
Ortalyq qıyn ómirlik jaǵdaıǵa tap bolǵan áıelder men balalarǵa jan-jaqty kómek kórsetedi. Áleýmettik beıimdeý, qujattaryn qalpyna keltirý, jumysqa ornalasýǵa járdemdesý, medıtsınalyq tekserýden ótý, járdemaqylardy resimdeý, qajet bolǵan jaǵdaıda múgedektik berý syndy keń aýqymdy qoldaý kórsetiledi. Sondaı-aq ortalyq qaýipsiz baspanamen, bes mezgil tamaqpen, bilikti psıhologııalyq kómekpen, balalardy mektepter men mektepke deıingi mekemelermen qamtamasyz etedi.
Kezdesý barysynda Ajar Saǵandyqova ortalyqtyń turmystyq jaǵdaıyn tekserip, qyzmetkerlermen jáne qamqorlyqqa alynǵandarmen áńgimelesip, mamandardyń kóptep tartylǵanyn jáne kásibı deńgeıin atap ótti.
— Ótken jyly qabyldanǵan áıelderdiń quqyqtary men balalardyń qaýipsizdigin qorǵaý týraly zań qazirdiń ózinde naqty nátıje berip jatyr. Áıelder kómekke jıi júgine bastady, zorlyq-zombylyq jaǵdaılaryna jaýap berip qana qoımaı, olardyń aldyn alýǵa da múmkindik týdy. Árbir áıel óziniń qaýipsiz ekenin jáne memlekettiń qoldaýyn sezinýi mańyzdy, - dedi depýtat.
Talqylaý barysynda kóterilgen máselelerdiń qatarynda ǵımaratty kúrdeli jóndeýden ótkizý, múmkindigi shekteýli jandarǵa qolaıly jaǵdaı jasaý, balalar oıyn alańyn salý, áıelder men balalardy medıtsınalyq tekserýden ótkizý, áleýmettik sharalarǵa alyp barý úshin qosymsha kólikpen qamtamasyz etý máseleleri aıtyldy.
Ajar Saǵandyqova aıtylǵan barlyq usynys pen másele eskeriletinin jáne daǵdarys ortalyqtary jelisin odan ári damytý men turmystyq zorlyq-zombylyqtyń júıeli aldyn alýdyń mańyzdylyǵyn atap ótti.
– Daǵdarys ortalyqtary jaı ǵana shuǵyl kómek kórsetetin oryn emes, jańa, qaýipsiz ómirge jol bastaıtyn ortaǵa aınalýy kerek. Mundaı ınstıtýttardy qoldaý – JSDP fraktsııasynyń basym baǵyttarynyń biri, - dedi Ajar Saǵandyqova.
Aıta ketelik Májilis depýtattary Aqsý qalasyndaǵy óndiris nysandarynda boldy.