Áıelder kúızelgen sátterinde anaǵurlym zeıindi bola túsedi
ASTANA. QazAqparat - Áıelder kúızelgen sátterinde anaǵurlym sezgish, zeıindi bola túsedi. Olar ádette mundaı jaǵdaıda áleýmettik qoldaýǵa úmit artady.
Bul soǵan baılanysty bolsa kerek, - dep jazady time.com.
Adamdar jan kúızelter sátterdi ár túrli qabyldaıdy eken. Biri tomaǵa-tuıyq kúıge túsip, aınalasymen sharýasy bolmaı ketse, endi biri eleńdep, aıaýshylyq bildirip, qıyndyqqa tap bolǵandarǵa qol ushyn bergisi kelip turady. Bul da kúızelisti jeńýdiń bir joly. Áıelder ádette aıaýshylyq arqyly áreket jasaıdy eken.
Ǵalymdar osy jaǵdaıdy zertteý maqsatynda 40 erkek jáne 40 áıelden quralǵan eki top jınaıdy. Sóıtip, olardyń keıbirimen kúızelistik test ótkizedi, ıaǵnı qalyń kópshiliktiń aldyna shyǵaryp, belgili bir taqyrypta sóz sóıletedi nemese qıyn esepti shyǵartady. Osydan keıin baryp adamdar óz sezimderi men ózgelerdiń talap-tilegin ajyrata alý qabiletterin baǵalaıtyn testen ótedi. Mysaly, olarǵa sórede jatqan zattardy jyljytý kerektigi aıtylady. Eger olar aıtylǵan nusqaýdy dál oryndap shyqsa, bul - basqa adamnyń kózqarasyn durys túsine bilý qabileti jáne belgili bir aıaýshylyq deńgeıi retinde baǵalandy.
Tájirıbe qorytyndysyna sáıkes, kúızelisti bastan keshken áıelder, baqylaý tobyndaǵy eshqandaı synaqtan ótpegen basqa áıelderge qaraǵanda, berilgen tapsyrmalardy óte jaqsy oryndap shyǵypty. Al er azamattarda kerisinshe. Júıkeni juqartar kúızelistik testen ótken olar, ishteı arpalysyp, baqylaý tobynda qannen-qapersiz demalyp otyrǵan basqa erkekterge qaraǵanda, berilgen nusqaýlardy nashar oryndap shyqqan. Demek, áıelder kúızelgen sátterde anaǵurlym sezgish, zeıindi bola túsedi. Olar ádette mundaı sátterde aınalasynan qoldaý izdeıtini belgili. Bul soǵan baılanysty bolsa kerek. Sonymen qatar, toryqqan sátterde erler men áıelderdiń gormondary árqalaı jumys isteı bastaıdy eken.
