Áıelder kúresinen Azııa chempıonatyna qatysatyn sportshylardyń esimi anyqtaldy
NUR-SULTAN. QazAqparat – Áıelder kúresinen Azııa chempıonatyna qatysatyn sportshylardyń esimi anyqtaldy, dep habarlaıdy QazAqparat.
Búginde áıelder kúresinen Qazaqstan ulttyq komandasy Nur-Sultan qalasynda oqý-jattyǵý jıynyn ótkizýde. Nurlan Amanqosov jattyqtyratyn balýan qyzdardyń aldynda eki iri báseke tur. Biri – Úndistanda ótetin Azııa birinshiligi bolsa, ekinshisi – qurlyqtyq lıtsenzııalyq týrnır.
Olympic.kz saıtyna suhbat bergen bas bapker mańyzdy dodalar aldyndaǵy komanda daıyndyǵyna baǵa berdi.
«Balýan qyzdar joǵary qarqynmen daıyndalýda. Búginde biz Azııa chempıonatyna jáne lıtsenzııalyq týrnırge qatysatyn sportshylar tizimin anyqtap qoıdyq. Jalpy, qurlyq dodasy men irikteý týrnırinde baq synaıtyn balýandardy Nurken Ábdirovti eske alýǵa arnalǵan halyqaralyq synda anyqtadyq. 18 aqpan kúni Úndistannnyń Nıý-Delı qalasynda Azııa birinshiligi bastalady. Atalǵan synǵa negizinen qosalqy quramdy aparamyz. Komandanyń 80 paıyzy jańarǵan. Úlken býyn ókilderinen Elmıra Syzdyqova bar. Álem chempıonatynyń qola júldegeri Valentına Islamova kúresedi. Qalǵan qyzdardyń barlyǵy da jas. Tájirıbeli Juldyz Eshimova jaraqatynan aıyqqan joq. Sol sebepti, eki jarystan da syrt qalyp otyr. Al Azııa birinshiliginen keminde 2-3 júldemen oralamyz degen oıdamyn. Ázirge, naqty qandaı medal buıyratynyn boljaı almaımyn», - deıdi Nurlan Amanqosov.
Azııa chempıonatyna qatysatyn Qazaqstan komandasy:
50 keli: Valentına Islamova;
53 keli: Tatıana Ahmetova;
55 keli: Marına Zýeva;
57 keli: Altynaı Satylǵan;
59 keli: Mádına Baqbergenova;
62 keli: Aıaýlym Qasymova;
65 keli: Gaýhar Muqataı;
68 keli: Albına Qaıyrgeldınova;
72 keli: Jámıla Baqbergenova;
76 keli: Elmıra Syzdyqova
