Áıelder kúresinen Azııa chempıonaty: Qazaqstan quramasy alǵashqy kúni eki altyn aldy
NUR-SULTAN. QazAqparat – Almaty qalasynda kúres túrlerinen ótip jatqan Azııa chempıonatynda áıelder arasynda búgin bes salmaqta jeńimpaz-júldegerler anyqtaldy, dep habarlaıdy QazAqparat tilshisi.
Qazaqstandyqtar, Tokıo olımpıadasy joldamasynyń ıegerleri Valentına Islamova-Brık pen Elmıra Syzdyqova ózderiniń babynda ekendigin tanyta bildi.
V.Islamova-Brık 50 kelige deıingi salmaqta qarsylas shaq keltirgen joq. Ol fınalda ózbekstandyq Jasmın Immaevany da merziminen buryn jeńip, altynnan alqa taqty.
Rıo Olımpıadasynyń qola júldegeri E.Syzdyqova 76 kg salmaqta alǵashqy beldesýinde qyrǵyzstandyq Aıperi Medetqyzyna 1:6 esebimen ese jiberip qoıdy. Degenmen ol óz tobynda ekinshi orynmen jartylaı fınalǵa, odan keıin sońǵy básekege joldama aldy. Fınalda Elmırany taǵy da A.Medetqyzy kútip turdy. Bul joly qazaqstandyq balýan qarsylasynan aılasyn asyryp, taza jeńdi.
Taǵy bir qazaqstandyq Aısha Ýálıshan 55 kelige deıingi salmaqta qola júldeger atandy.
Osylaısha áıelder arasynda jarystyń alǵashqy kúni Qazaqstan quramasy eki altyn, bir qola medalǵa qol jetkizdi. Erteń taǵy bes salmaqta myqtylar anyqtalady. Bıyl Azııa birinshiligine Qytaı men Japonııa quramalary qatysyp jatqan joq. Sondyqtan basqa elderdiń balýandaryna komandalyq esepte top jarýǵa múmkindik týyp tur.
