Áıelder kúresinen álem chempıonatynda úsh qazaqstandyq jartylaı fınalǵa ótti
NUR-SULTAN. QazAqparat – Búgin elorda tórinde kúres túrlerinen ótip jatqan álem chempıonatynyń tórtinshi kúni bozkilemge shyqqan balýan qyzdarymyzdyń úsheýi jartylaı fınalǵa ótti, dep habarlaıdy QazAqparat tilshisi.
Atap aıtar bolsaq, 72 kelide beldesetin Jámıla Baqbergenova ekinshi aınalymda túrkııalyq balýandy 10:0 esebimen jeńip, jartylaı fınalǵa joldama alsa, 55 kelide beldesetin Marına Sedneva polshalyq balýan Lýkasıakany 5:0 esebimen jeńip, jartylaı fınalǵa ótti. Sondaı-aq, 50 keli salmaqta shırek fınalda túrkııalyq Evın Demırhandy 12:2 esebimen jeńgen jerlesimiz Valentına Islamova jartylaı fınalǵa shyǵyp qana qoımaı, Tokıo Olımpıadasynyń joldamasyn qanjyǵasyna baılady.
Endi, Baqbergenova jartylaı fınalda Olımpıada chempıony, reseılik Natalıa Vorobevamen kezdesse, Sedneva japonııalyq balýanmen kúsh synasady. Al Islamova jartylaı fınalda rýmynııalyq sportshymen fınal joldamasyn sarapqa salady.
Esterińizge sala keteıik, osyǵan deıin Valentına Islamova áıelder kúresinen Olımpıadaǵa joldama jeńip alǵanyn jazǵan bolatynbyz.
