Áıelder qoǵamdaǵy kelisim men turaqtylyqty, úılesimdilikti berik ustap turǵan názik jandar - Qarjy mınıstri
ASTANA. QazAqparat - QR Qarjy mınıstrliginde ótken 8 naýryz - Halyqaralyq áıelder kúni merekesine arnalǵan saltanatty sharada mınıstr Baqyt Sultanov ujym arýlaryn merekemen quttyqtady. Bul týraly vedomstvonyń baspasóz qyzmetinen habarlandy.
Mınıstr óz quttyqtaýynda názik jandy arýlar vedomstvoda er azamattarmen birdeı eńbek etetinin, mınıstrlik qyzmetkerleriniń basym kópshiligin áıel azamattary quraıtynyn atap ótti. «Otan - otbasynan bastalady, al onyń qorǵany da, uıytqysy da - áıel zaty. Qoǵamda ananyń orny erekshe, sebebi jer betindegi adamzat tirshiligi analardan bastaý alady. Áıelder shyn mánisinde bizdiń qoǵamymyzdaǵy kelisim men turaqtylyqty, úılesimdilikti berik ustap turǵan názik jandar! Eń bastysy qaı jerde jumys jasasa da áıelder qaýymy sol ortaǵa jylylyq pen jaılylyqty, senimdilik pen jaýapkershilikti, ádemilikti birge ala keledi», - dedi B. Sultanov.
Sonymen qatar, B. Sultanov qarjy júıesiniń irgetasyn qalaýǵa atsalysqan mınıstrliktiń eńbek sińirgen qyzmetkerlerine de alǵysyn bildirdi. Saltanatty is-shara barysynda sińirgen aıryqsha eńbegi men ereń eńbegi úshin birqatar ardagerler «Eńbek ardageri» medalimen marapattaldy.
