Áıelder klımattyń ózgerýinen kóbirek zardap shegedi - BUU
ASTANA. QazAqparat - Tabıǵı apat zardaptaryn joıý jáne onyń saldaryn azaıtý barysynda áıelder men qyz balalar basty nazarǵa alynýy tıis. Sebebi olar ǵalamshardaǵy klımattyń ózgerýinen bolatyn quıyn, daýyl jáne sý basý saldarynan kóbirek zardap shegedi. Bul týraly BUU-nyń Jenevada ashylǵan áıelderge qatysty kemsitýshilikti joıý boıynsha komıtettiń sessııasynda aıtyldy.
Komıtet músheleri tabıǵı apattar men klımattyń ózgerý saldarynan áıelderge keler zardaptar máselesi boıynsha arnaıy otyrys ótkizý jóninde sheshim qabyldaǵan.
Otyrysta sóz sóılegen Dúnıejúzilik meteorolgııalyq uıymnyń Bas hatshysynyń kómekshisi Elena Manaenkova 2004 jyly Úndi muhıtynda bolǵan tsýnamı qurbandarynyń kóbi áıelder ekenin, buǵan olardyń júzýdi bilmeýi, ári qımyldaýǵa kedergi keltiretin uzyn kıim kıgeni sebep bolǵanyn atap ótti. 1991 jyly Bangladeshte sý tasqyny saldarynan 140 myń áıel qaza tapqan, olardyń sany er adamdardan 14 ese kóp edi. Bul áıelderdiń qajetti aqparatqa qol jetkizý múmkindiginiń joqtyǵymen baılanysty.
«Damýshy elderdegi áıelderdiń 60-tan 70-ke deıin paıyzy aýyl sharýashylyǵy salasynda eńbek etedi. Sonymen qatar, Úndistanda aýa raıy týraly uıaly telefondarǵa habarlamalar jiberilgende, ony alǵandardyń 11 paıyzy ǵana áıelder bolǵan. Qazir álemde 300 mıllıon áıelde uıaly telefony joq ekenin anyqtadyq», - dedi Elena Manaenkova.
