Áıelder qaýymy jańa áleýmettik saıasatty tolyq qoldaıdy - Gúlshara Ábdiqalyqova
«Elbasy Nursultan Nazarbaev Nur Otan partııasynyń kezekti XVII sezinde Qazaqstandy damytýdyń jańa kezeńine jol ashylǵanyn atap ótti. Aldaǵy on jyl bizdiń órkenıetti 30 memlekettiń qataryna jyljýymyzdaǵy sheshýshi kezeń bolmaq. Áleýmettik damytýǵa arnalǵan kezek kúttirmes sharalardy iske asyrý - búgingi kúnniń talaby. Osyǵan baılanysty búginde úsh baǵyt boıynsha jańa áleýmettik saıasat iske asyrylady. Az qamtylǵan toptardyń tabysyn arttyrý jáne qoldaý, tabysy tómen azamattardyń turǵyn úı máselesin sheshý, bilim berý men densaýlyq saqtaý salalaryn jaqsartý, úshinshi - óńirlerdi keshendi túrde damytý», - deıdi G.Ábdiqalyqova.
Gúlshara Naýshaqyzy QR Prezıdenti Qasym-Jomart Toqaevtyń Elbasynyń syndarly saıasatyn jalǵastyratynyn da taǵy bir márte eske saldy. Osy oraıda memlekettiń baǵyty úsh negizgi prıntsıpke negizdeledi. Olar - sabaqtastyq, ádildik jáne progress. «Áıelder qaýymy da jańa áleýmettik saıasatty tolyq qoldaıdy jáne júzege asyrýǵa belsendi atsalysady dep senemiz», - dedi G.Ábdiqalyqova.
Otyrys barysynda «Qazaqstannyń áıelderi men erleri» atty jyl saıynǵy jınaqtyń statıstıkalyq málimetterin jınaqtaý máselesi qaraldy. Resmı aqparatqa sáıkes, aǵymdaǵy jyldyń basynda Qazaqstan halqynyń sany 18,4 mıllıon adam boldy. Sonyń 9,5 mıllıony - áıelder. Elimizde 4 mıllıon otbasy bar. Onyń ishinde 340 myńnan astamy - kópbalaly otbasylar. 132 606-sy qalada, 207 771-i aýylda turady.
Budan bólek, búgingi otyrysta Aqmola oblysynda 2030 jylǵa deıingi QR Otbasy jáne gender saıasatyn iske asyrýdyń úsh jyldyq josparyn atqarý jaıy da talqylandy. Sondaı-aq, komıssııa múshelerine Pekın deklaratsııasyn oryndaý jónindegi ulttyq sholýdyń jobasy tanystyryldy.
