Áıelder qaýqarly bola tura, óte álsiz - Qaraqat Ábildına
ASTANA. QazAqparat - Ánshi, «Qaraqat» mektep-stýdıosynyń dırektory, qazaqstannyń eńbek sińirgen qaıratkeri Qaraqat Ábildına «áıeldiń qyryq jany bar» degen tirkesti endi túsinip jatyrmyn deıdi.
«Ana» degen ardaqty atqa laıyq bolý - úlken jaýapkershilik. Sonymen qatar, el aldynda júrip án aıtý, úlgi bolý - ol da aýyr mindet. Kóp jýrnalıs «osynyń bárine qalaı úlgeresiz» dep surap jatady. Áıeldiń «qyryq jany bar» degendi endi túsinip jatyrmyn. Biz bir sátte otyryp, birneshe máseleni oılaı alamyz, biz qatarynan birneshe suraqty sheshetin qaýqarymyz bar. Biraq, solaı bola tura, biz álsizbiz»,-deıdi ánshi.
Qaraqat Ábildına «qyz bala ómirlik serigin tapqanda, óz oshaǵynyń otyn jaqqanda baqytty bolady» degen aqylyn aıtyp, jary Qydyráli Bolmanovqa zor alǵysyn bildirdi.
«Meniń án aıtyp, onymen qosa balalarymdy dúnıege ákelip, osynyń bárine úlgerip júrgenim aldymen halqymnyń aq batasynyń jáne azamatymnyń úlken qoldaýy»,-deıdi ánshi.
Sóz ońynda Qaraqat Ábildına qyz-kelinshekterdi 8 naýryz merekesimen quttyqtady.
«Ardaqty analar, qyz-kelinshekter! Barlyqtaryńyzdy kóktemniń shýaqty kúnimen, tirshiliktiń oıanyp, shýaǵyn shashyp, adamzatqa qýanysh syılaıtyn merekesimen quttyqtaımyn»,-dedi ánshi.
