Kásipker áıelderdi qarjylandyrýdy baqylaıtyn ulttyq tsıfrlyq platforma iske qosyldy
ASTANA. KAZINFORM – QR Qarjy naryǵyn retteý jáne damytý agenttigi áıel kásipkerlerdi qarjylandyrýdy monıtorıngteýge arnalǵan ulttyq analıtıkalyq platformany iske qosty.
Jańa tsıfrlyq resýrs Qazaqstandaǵy áıelderdiń qarjy resýrstaryna qoljetimdiligin júıeli ári ashyq baǵalaýǵa múmkindik beredi. Platforma Qazaqstandaǵy áıelder kásipkerligin qarjylandyrý baǵdarlamasy aıasynda Eýropalyq qaıta qurý jáne damý bankimen birlesip ázirlengen.
Agenttik kredıtter boıynsha derekterdi jınaqtap, júıelep, áıel kásipkerlerdi sáıkestendirý ádisnamasyn ázirledi. Bul tásil alǵash ret áıelderdiń kásipkerlikti kredıtteýge qatysýy týraly tolyq ári senimdi kórinis qalyptastyrýǵa múmkindik berdi.
«Baǵdarlamanyń negizgi baǵyttarynyń biri – áıel kásipkerlerdiń qarjylyq qyzmetterge qoljetimdiligin keńeıtýge jáne qabyldanatyn sheshimderdiń sapasyn arttyrýǵa múmkindik beretin derekterdi jınaý, taldaý jáne paıdalaný júıesin damytý», – delingen agenttik habarlamasynda.
Platforma bank jáne mıkroqarjy uıymdary sektorlaryndaǵy áıel kásipkerlerdi qarjylandyrýǵa keshendi monıtorıng júrgizedi. Onda shaǵyn, orta jáne iri bıznes sýbektileriniń kredıttik portfelderi qamtylǵan.
Sondaı-aq júıe kredıttik portfeldiń negizgi kórsetkishterin, onyń qurylymy men sapasyn, qarjylandyrýdyń salalyq jáne óńirlik erekshelikterin, qaryz alýshylardyń demografııalyq jáne uıymdyq sıpattamalaryn taldaýǵa múmkindik beredi.
Biryńǵaı súzgileý júıesi esepti kún, kásipkerlik sýbektisiniń túri, bıznes kólemi jáne óńirler boıynsha túrli analıtıkalyq derekterdi qalyptastyrýǵa jaǵdaı jasaıdy. Bul paıdalanýshylarǵa jalpyulttyq kórsetkishterden bastap jekelegen óńir nemese sala boıynsha egjeı-tegjeıli taldaý júrgizýge múmkindik beredi.
«Platformanyń iske qosylýy áıel kásipkerlerdi qarjylandyrý týraly aqparattyń ashyqtyǵyn arttyrýǵa, sheshimder qabyldaý úshin analıtıkalyq bazany nyǵaıtýǵa jáne áıelder kásipkerligin qoldaý sharalarynyń dáleldi negizin qalyptastyrýǵa yqpal etedi», – dep málimdedi agenttik.
Platforma wefikazakhstan.com ınternet-resýrsynda ornalastyrylǵan. Ol táýlik boıy qoljetimdi jáne qazaq, orys, aǵylshyn tilderinde jumys isteıdi.
Aıta keteıik, elde áıelder kásipkerligin baǵalaıtyn Gender Index platformasy ázirlenedi.
