Áıelder kásipkerligin damytý ortalyǵynyń ashylýy bıznesin keńeıtetinderge tıimdi - Aqtóbe
Áıelder kásipkerligin damytý ortalyǵy bıznes basqarýǵa nıetti názik jandy aqtóbelikterdi oqytyp, keıin isin júrgizýge kómektesedi. Sondaı-aq bıznesti qoldaý baǵdarlamalary sheńberinde jeńildikpen kredıt jáne granttarǵa qol jetkizý jolyn úıretedi. Áıelderdi jumyspen qamtý, olar óndirgen taýarlar men qyzmetterdiń suranysyn arttyrý jolynda da kóp is atqarmaq.
«Jeke kásipkerlik salasynda áıelder basqaratyn kompanııalar sany Aqtóbe oblysynda 52,7% quraıdy. Olar elimizdiń ekonomıkasy men kásipkerliginiń damýyna úlken úles qosyp keledi. Jumys oryndaryn quryp, qaıyrymdylyqpen de aınalysyp júr. Al bul ortalyqtyń ashylýy jeke kásibin quryp, bıznesin keńeıtkisi keletinder úshin tıimdi», - dedi Aqtóbe oblysy Kásipkerler palatasynyń dırektory Dana Bekbaýova.
Ortalyq kásipker áıelderdi qarjylaı emes qoldaý alańyna aınalýǵa tıis. Olar startup-tardy iske qosý, jumys istep turǵan bıznesti odan ári keńeıtý jáne damytý úshin birqatar qyzmet ala alady.
«Jobanyń basty maqsaty - áıelder júrgizetin bızneske taldaý júrgizý jáne damý áleýetin aıqyndaý. Ortalyqqa kelip, ótinish bildirgender keńes alyp, trenıngter men sheberlik sabaǵyna qatysa alady. Kooperatsııa men áleýmettik kásipkerlik tetigin úırenip, qarjylandyrý jolyn (kraýdfandıng, ınvestıtsııalar, granttar, lızıngter) meńgeredi. Sondaı - aq, halyqaralyq jobalarǵa qatysýǵa kómek kórsetiledi», - dedi Aqtóbe oblysy isker áıelder keńesiniń tóraǵasy Kúlparshyn Aıdarhanova.