Áıelder isteıtin jerde tártip bar - mınıstr Qasymov
ASTANA. QazAqparat - Búgin 8 naýryz - Halyqaralyq áıelder kúni merekesi qarsańynda QR Іshki ister mınıstri Qalmuhanbet Qasymov birqatar qyzmetkerlerdi marapattady, dep habarlaıdy QazAqparat tilshisi.
Atap aıtqanda, qyzmetin adal atqarǵany jáne jumysta joǵary jetistikterge jetkeni úshin QR ІІM Esirtki bıznesine qarsy kúres departamenti basqarma basshysynyń orynbasary, polıtsııa podpolkovnıgi Elena Vaganova, QR Ulttyq ulany Bas qolbasshylyǵynyń tyldy basqarý qyzmetiniń bastyǵy, podpolkovnık Janar Dosjanova, Krımınaldy polıtsııasy departamentiniń sarapshysy Janar Júnisova, Memlekettik til jáne aqparat departamentiniń jetekshisi Álııa Shermaǵambetova qurmet gramotasymen marapattalsa, Qylmystyq atqarý júıesi komıteti arnaıy esep bóliminiń bas sarapshysy, ádilet podpolkovnıgi Janna Makarımovaǵa II dárejeli «Іshki ister organdarynyń úzdigi» tósbelgisi tabystaldy. Al Tótenshe jaǵdaılar komıteti memlekettik qupııalardy qorǵaý bóliminiń bas sarapshysy Gúlnár Qurmanbaeva «Azamattyq qorǵaý júıesine qosqan úlesi úshin» tósbelgisi tapsyryldy.
Budan bólek, Tergeý departamenti basqarma basshysynyń orynbasary, polıtsııa polkovnıgi Aınagúl Qalıeva, Ákimshilik polıtsııanyń bas ınspektory, polıtsııa podpolkovnıgi Dildar Tólegenova, Kóliktegi jelilik ishki ister departamentiniń esirtki bıznesine qarsy kúres basqarmasynyń qyzmetkeri, polıtsııa kapıtany Ásemgúl Atabıeva mınıstrliktiń alǵys hattaryna ıe boldy. Sondaı-aq, búgingi merekelik shara barysynda «Polıtsııa.kz-2017 arýy» baıqaýynyń jeńimpazy, Astana qalalyq áýejaıyndaǵy JІІB Ákimshilik polıtsııa bóliminiń aǵa leıtenanty Janbota Qarıbekova marapattaldy.
«Búginde áıel azamattar jumys istemeıtin sala joq. Máselen, bizde arnaıy maqsattaǵy jasaqta da, órt sóndirý qyzmetinde de, qylmystyq atqarý júıesinde de, krımınaldy polıtsııada da, patrýldik polıtsııada da áıelder eńbek etip keledi. Sondyqtan biz Sizderdiń qoldaýlaryńyzdy sezip otyramyz. Áıelder jumys isteıtin jerde tártip te, zańdardy buljytpaı oryndaý da bar. Búgingi kúndi paıdalanyp, Sizderge zor densaýlyq, mol tabys tileımin», - dedi mınıstr Qasymov.
Aıta keteıik, búginde ishki ister organdarynda 12 myńnan astam áıel jumys isteıdi. Olardyń 600-den astamy basshylyq laýazymda qyzmet atqaryp júr. Áıel azamattardyń basym bóligi jergilikti polıtsııada, mamandyrylǵan kúzet qyzmetinde, saraptamalyq-krımınalıstik jáne tergeý bólimderinde, krımınaldy polıtsııada eńbek etedi.
