Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy ótti
Otyrysqa Parlament depýtattary, Ulttyq komıssııa músheleri, ortalyq memlekettik jáne jergilikti atqarýshy organdardyń, úkimettik emes uıymdar men BAQ ókilderi qatysty.
Otyrysty asharda Ulttyq komıssııa tóraıymy Lazzat Ramazanova Memleket basshysynyń «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýynda qoıylǵan mindetter memlekettik jáne jergilikti atqarýshy organdardan qazaqstandyq otbasylardyń ál-aýqatyn jaqsartý jáne áıelderdiń quqyqtary men múmkindikterin keńeıtý úshin joǵary jaýapkershilik pen úılesimdi is-qımyldy talap etetinin atap ótti.
«Otbasy ál-aýqatynyń máseleleri, turmystyq zorlyq- zombylyqtyń júıeli aldyn alý boıynsha qoǵamdyq uıymdarmen tıimdi ózara is-qımyl jasaý, ómirlik qıyn jaǵdaıǵa tap bolǵan azamattarǵa ýaqtyly kómek kórsetý - bul máseleler Ulttyq komıssııa jumysynda basym bolyp qala beredi», - dep atap ótti Lazzat Ramazanova.
Otyrysta 5 óńirde: Nur-Sultan, Shymkent qalasy, Almaty, Shyǵys Qazaqstan jáne Mańǵystaý oblystarynda «Otbasyndaǵy zorlyq-zombylyqsyz Qazaqstan» pılottyq jobasynyń iske asyrylý barysy týraly aqparat tyńdaldy. Jobanyń maqsaty - otbasy ınstıtýtyn nyǵaıtý jáne otbasylyq-turmystyq saladaǵy quqyq buzýshylyqty azaıtý.
Turmystyq zorlyq-zombylyqtyń aldyn alý júıesiniń jaı-kúıin taldaý árbir ekinshi qylmys mas kúıinde jasalatynyn, zańsyz áreketterdiń 70-75% turǵyn úı-jaılarda oryn alatyndyǵyn kórsetti. 80% jaǵdaıda zorlyq - zombylyq sýbektileri bolyp erli-zaıypty nemese azamattyq nekede turǵan adamdar, 20% - ózge týystyq qatynastaǵy adamdar bolyp tabylady.
Júrgizilip jatqan jumysqa qaramastan, sheshýdi talap etetin birqatar problemalar bar. Aýmaqtardy damytý josparlarynda otbasy ınstıtýtyn nyǵaıtý jáne turmystyq zorlyq-zombylyqtyń aldyn alý máseleleri boıynsha túıindi nysanaly ındıkatorlar joq ekeni anyqtaldy. Jergilikti atqarýshy organdardyń quzyreti naqtylanbaǵan. Aldyn alý júıesine ádilet, mádenıet jáne sport, ishki jáne jastar saıasaty organdary tartylmaǵan.
«Júıeli monıtorıngti engizý, áleýmettik qolaısyzdyq pen turmystyq zorlyq - zombylyq máseleleri boıynsha vedomstvoaralyq ózara is-qımyldy jáne jedel den qoıý tetikterin nyǵaıtý qajet», - dep atap ótti Lazzat Ramazanova.
Eńbek jáne halyqty áleýmettik qorǵaý mınıstrligi men Strategııalyq josparlaý jáne reformalar jónindegi agenttiginiń Ulttyq statıstıka bıýrosynyń óńirlerdegi otbasylardyń ál-aýqatyna monıtorıng júrgizý nátıjeleri jáne Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasynyń ındıkatorlaryn esepteý ádistemesi týraly aqparaty tyńdaldy.
Eńbek jáne halyqty áleýmettik qorǵaý mınıstrliginiń aqparaty boıynsha, «Otbasynyń tsıfrlyq kartasyn» engizý josparlanýda. Elimizdiń 19 mln. turǵynyna taldaý júrgizildi, 5 mln. 341 myń otbasynyń tsıfrlyq kartalary qalyptastyryldy. Búgingi tańda otbasylardyń 2,7 mln nemese 50,6%-y qolaıly jáne jaqsy deńgeıge jatady. Ataýly áleýmettik kómekpen qamtý 2020 jyldyń uqsas kezeńimen salystyrǵanda 186,2 myń otbasyna deıin nemese 891,1 myń adamnan astam ósti, ósim 25%-dy qurady.
Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasyn iske asyrý sheńberinde Ulttyq statıstıka bıýrosy 9 nysanaly ındıkator boıynsha esepteý ádistemesin ázirledi. Ol otbasylyq jáne genderlik saıasatty iske asyrý tıimdiliginiń negizgi kórsetkishterin qalyptastyrý tártibin júıelendirýge, derekterdi jınaý, usyný jáne olardy saqtaý úshin ýákiletti memlekettik organdardyń jaýapkershiligin bekitýge múmkindik beredi.
Otyrys sońynda QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lazzat Ramazanova memlekettik organdarǵa birqatar naqty usynystar berdi.
