Áıelder isi jáne otbasylyq-demografııalyq saıasat jónindegi ulttyq komıssııa men «Dıalog Eýrazııa» qory memorandýmǵa qol qoıdy
ASTANA. 22 qarasha. QazAqparat /Marlan Jıembaı/ - QR Prezıdenti janyndaǵy Áıelder isi jáne otbasylyq-demografııalyq saıasat jónindegi ulttyq komıssııa men «Dıalog Eýrazııa» halyqaralyq qoǵamdyq qory arasyndaǵy yntymaqtastyq týraly memorandýmǵa qol qoıyldy.
Búgin elordada ótken «Otbasy jáne qoǵam: dástúrler, qundylyqtar jáne damý keleshegi» atty halyqaralyq konferentsııa aıasynda atalǵan qujatqa komıssııa tóraıymy, QR Eńbek jáne halyqty áleýmettik qorǵaý mınıstri Gúlshara Ábdiqalyqova men qor prezıdenti Salıh Akchaı qol qoıdy.
«Dıalog Eýrazııa» qory otbasy qundylyqtaryna jáne onyń máselelerine basa nazar aýdaryp júrgen uıymdardyń biri ekendigin erekshe atap ótken mınıstr: «Memorandýmnyń basty maqsaty, birinshiden - halyqaralyq deńgeıde otbasy máseleleri boıynsha tájirıbe almasý. Ekinshiden - otbasylyq qundylyqtar boıynsha halyqtyń arasynda túsindirme jumystaryn, basqa da osy jaǵdaılarǵa yqpal etetin ıgi isterdi júzege asyrý», - deıdi.
Aıta keteıik, qor 2000 jyly Ystambul qalasynda Eýrazııa elderi men halyqtary ıntellegentsııa ókilderiniń bastamasymen ótken jazýshylar men jýrnalıster qaýymdastyǵynyń kezdesýinde suhbattastyq ornatýǵa úles qosý, olardyń ózara túsinistigi men beıbit qatar ómir súrýine járdemdesý maqsatynda qurylǵan bolatyn. Onyń quramyna Qazaqstan, Túrkııa, Reseı, Rýmynııa, Ýkraına syndy 14 memleket kiredi.
