Áıelder hokkeıinen qazaqstandyq komanda Eýropalyq chempıondar kýbogynyń kelesi kezeńine ótti
ASTANA. QazAqparat - Qazaqstannyń «Aısulý» áıelder komandasy Túrkııanyń Ankara qalasynda shaıbaly hokkeıden Eýropalyq chempıondar kýbogynyń (EWCC) irikteý týrnırine qatysty. Bul týraly QR SІM baspasóz qyzmetinen habarlady.
Bul týrnır 2005 jyldan beri ótkizilip keledi. 2014 jylǵy jarys maýsymynyń formaty 3 kezeńmen ótkiziledi. Birinshi kezeńde eýropalyq 16 komanda 4 komandadan 4 topqa (A, B, C, D) bólindi. Qazaqstan chempıony - «Aısulý» komandasy Túrkııanyń («Mıllenıým Ankara»), Slovakııanyń (HK Poprad») jáne Rýmynııanyń («HSC Csikszereda») komandalarymen qatar A tobynda óner kórsetti. Ekinshi kezeńge óz toptarynyń jeńimpazdary jáne ekinshi oryndy ıelengender shyǵady. Kýboktyń fınaly 2015 jylǵy aqpanda uıymdastyrylady.
Týrnırdiń irikteý oıyndary 2014 jylǵy 17-19 qazan aralyǵynda ótkizildi. Іrikteý synynyń jabylý saltanaty 19 qazanda Ankaranyń Ortalyq Muz aıdynynda uıymdastyryldy. Túrkııadaǵy qazaq dıasporasynyń ókilderi, qazaq stýdentteri jáne Qazaqstannyń Túrkııadaǵy Elshiliginiń dıplomattary Qazaqstan komandasyna jankúıer boldy.
Qazaqstannyń Túrkııadaǵy Elshisi J.Túımebaev hokkeıshi áıelder komandasyn Elshiliktiń ǵımaratynda qabyldap, jarysta sáttilik tileı otyryp, syılyqtar men kádesyılar usyndy.
Aıta keteıik, «Aısulý» áıelder hokkeı klýby 2005 jyly qurylǵan. Komanda Qazaqstan quramasynyń negizgi klýby bolyp tabylady. Klýb oıynshylary QR qurama komandasynyń sapynda Astana jáne Almaty qalalarynda ótken Qysqy Azııa oıyndarynyń jeńimpazy atanǵan. Sondaı-aq,ótken maýsymda komanda Sochıdegi klýbtyq jarystan jeńispen oralǵan.
