Áıelder fýtboly: «Aqtóbe» men BIІK arasyndaǵy oıyn aıtýly oqıǵalarmen este qaldy
ASTANA. KAZINFORM – 27 shildede Aqtóbedegi Qobylandy batyr stadıonynda áıelder arasynda el birinshiligindegi este qalar erekshe match ótti. 8 500-den astam kórermen jınalǵan tartysqa toly oıyn alǵash ret Qazsport arnasynan tikeleı efırde kórsetildi.
Fınalǵa bergesiz match erler arasyndaǵy básekeden esh kem túsken joq. Óıtkeni alańda Qazaqstannyń UEFA Chempıondar lıgasyndaǵy eki ókili – tájirıbeli «BIІK-Shymkent» pen azýly «Aqtóbe» komandasy sheberlik baıqasty.
Oıyn aldynda jáne kezdesý barysynda da stadıonda erekshe atmofsera ornady. Match bastalmas buryn qazaqstandyq ánshiler Aıqyn men Moonsongs án shyrqap, kórermenderge keremet kóńil kúı syılady. Bir sózben aıtqanda, Qobylandy batyr atyndaǵy stadıon jankúıerge toly boldy jáne olar oıyn boıy óz komandasyna tamasha qoldaý kórsetip, «Aqtóbeni» jeńiske jeteledi. Osylaısha Aqtóbedegi match Qazaqstandaǵy áıelder fýtbolyn jańa deńgeıge kóterdi.
Aıta keteıik, 2025 jylǵy el chempıonatyna birinshi ret 14 komanda qatysyp jatyr. Burymdylar arasyndaǵy dop dodasynyń jyl ótken saıyn kórigi qyzyp, básekelestik artyp keledi. Elimiz boıynsha 10 myńnan astam qyz fýtbol oınap júrgenin de erekshe atap ótken jón. UEFA da fýtboldan Qazaqstan lıgasyn Eýropadaǵy eń jyldam damyp kele jatqan lıgalardyń sanatyna qosyp otyr. Bul el fýtbolyna erekshe serpilis syılaıdy.
Eske sala keteıik, buǵan deıin fýtboldan áıelder arasyndaǵy Qazaqstan chempıonatynda «Aqtóbe» óz alańynda BIІK komandasyn 3:2 esebimen jeńgenin jazǵan edik.