Áıelder boksynyń juldyzdary Astanadaǵy álem chempıonatynda óner kórsetedi (FOTO)
ASTANA. QazAqparat - Álemdegi úzdik boksshy áıelder álem chempıonatyna qatysý úshin Astanaǵa keledi. Munda medaldarmen birge úsh salmaq dárejesinde 12 olımpıadalyq lıtsenzııa oınatylady, dep habarlady Qazaqstan boks federatsııasynan.
Halyqaralyq boks qaýymdastyǵynyń saıty aiba.org: «Bul chempıonat óziniń 15 jyldyq tarıhyndaǵy eń tartymdysy bolýy múmkin», - dep boljady.
Irlandııalyq Ketı Teılor men úndistandyq sportshy Merı Kom Astanada rekord ornatyp, óz karerasynda altynshy ret álem chempıony atanýǵa nıetti.
Altynǵa úmittilerdiń qatarynda amerıkalyq Klaressý Shılds, brıtanııalyq Nıkola Adams - London Olımpıadasynyń chempıondary, sonymen qatar qytaılyq Ren Kankan bar.
Barlyǵy 326 sportshy qatysýǵa nıet bildirdi. Bul áıelder chempıonatynyń rekordtyq kórsetkishi. Álem birinshiligine alǵash ret Iordanııa, Mozambık jáne Serra-Leone ókilderi qatysady.
«Komandalardyń basym bóligi Astanaǵa keldi, olar boksty damytý ortalyǵynda, «Tolqyn» sport kesheninde jáne «Astana-arenada» jattyǵyp jatyr. Bizdiń sportshylar AQSh, Fınlıandııa jáne Chernogorııa komandalarymen birlesip jattyǵý ótkizdi», - dedi federatsııa ókili.
«Astanadaǵy álem chempıonaty álemdegi áıelder boksyn jańa deńgeıge kóteredi, - dedi AIBA prezıdenti Chıng-Kýo Vý. - Oǵan ataqty chempıondar men daryndy jastar qatysady».
Jarys kúnderi jankúıerler úshin «Barys-arenaǵa» kirý tegin. Ashylý saltanaty 19 mamyrda saǵat 18:00-de ótedi. 
