Áıelder boksynda endi shlem qoldanylmaıtyn bolady
ASTANA. KAZINFORM – Endi aldaǵy ýaqytta burymdy boksshylar da, erler sııaqty sharshy alańda shlemsiz judyryqtasady.
Bul týraly halyqaralyq boks qaýymdastyǵynyń (IBA) resmı saıtynda jarııalandy.
Atap aıtsaq, atalǵan sheshim Sochıde ótken dırektorlar keńesiniń otyrysynda qabyldanǵan. IBA ázirge bul sheshimge ótý úshin úsh kezeń qarastyrǵan.
Naqtyraq aıtsaq, áıelder arasyndaǵy jekpe-jekterde shlemge tyıym salý maýsym aıynan soń kúshine enbek. Negizi bul talap bir jyl buryn talqylana bastaǵan eken.
Sonymen qatar Sochıde ótken dırektorlar keńesiniń otyrysynda Belgrad 2025 jyly áıelder arasynda bokstan álem chempıonatyn ótkizý quqyǵyna ıe bolǵany resmı túrde jarııalandy.
Esterińizge sala keteıik, ótken jyly Tashkentte ótken Halyqaralyq boks qaýymdastyǵyn (IBA) dırektorlar keńesiniń resmı otyrysynda 2024 jylǵy áıelder arasyndaǵy álem chempıonaty Astanada ótetini týraly sheshim qabyldanǵan bolatyn.
Este bolsa, 2016 jyly Astanada áıelder arasyndaǵy álem chempıonaty ótip, sol jarysta Qazaqstan quramasy tabysty óner kórsetti. Qazaqstandyqtar onda 4 altyn men 2 qola medal oljalaǵan edi. Onda, Nazym Qyzaıbaı, Dına Jolaman, Valentına Halzova jáne Lázzat Kúngeıbaeva teńdessiz dep tanylsa, Jaına Shekerbekova men Aıjan Qojabekova úshinshi satyǵa taban tiredi.
