Áıelder bıznespen óz qalaýymen emes, qajettilik týyndaǵan soń aınalysady
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda «Ekonomıkalyq zertteýler ınstıtýty» AQ Kásipkerlikti damytý ortalyǵynyń dırektory Nurlan Qulbatyrov málim etti.
«Elbasy óz Joldaýynda jáne «100 naqty qadam» atty Ult josparynda elimizde kásipkerlikti damytý, ony qoldaý jáne iskerlik ahýaldy odan ári jaqsartýǵa baılanysty birneshe basym baǵyttardy atap kórsetti. Bul basym baǵyttar elimizdiń negizgi strategııalyq baǵyttary bolyp tabylady»,- dedi ol.
Osy oraıda N.Qulbatyrov QR Úkimeti, Ulttyq ekonomıka mınıstrligi reformalardy bastap ta ketkenin aıtyp, kez-kelgen reformalardy bastamas buryn oǵan aýqymdy aqparattyq-saraptamalyq zertteýler júrgiziletindigin eske saldy.
«Sondaı zertteýlerdiń biri osy «Kásipkerlikti jahandyq baqylaý», ıaǵnı Global Entrepreneurship Monitor (GEM) dep atalatyn joba. Bul jobaǵa Qazaqstan Respýblıkasy 2014 jyly birinshi ret qatysyp otyr. Buǵan deıin 2007 jyly ilki úlgide qatysqan edi», - dedi ol.
Onyń atap ótýinshe, bul jobaǵa álemdik jalpy ishki ónimniń 90 paıyzyn qamtamasyz etetin 72 memleket qatysady. Aıta keterligi, joba bıznes ortany jaqsartýǵa baılanysty sheshimder qabyldaýdyń tıimdi quralyna aınalyp otyr.
«Qazaqstan - atalǵan jobaǵa qatysyp otyrǵan Orta Azııa óńirindegi alǵashqy memleket. Qazaqstannyń osy zertteý aıasyndaǵy alǵashqy jetistikterine toqtalsaq, elimiz 13,7 paıyzdyq deńgeıde kásipkerlik belsendilikti kórsetip otyr. Qazaqstandaǵy kásipkerlerdiń úshten bir bóligi jalaqyǵa balama retinde nemese jumystyń bolmaýy saldarynan bıznespen aınalyssa, erlerge qaraǵanda áıelder óz qalaýy emes, qajettiligi boıynsha bıznespen aınalysatynyn málimdegen. Jalpy, orta eseppen alǵanda eldiń jumysqa qabiletti turǵyndarynyń shamamen 13 paıyzy kásipkerlik qyzmetpen aınalysady», - dedi N.Qulbatyrov.
