Áıelder arnaıy platformada dánekerleý jáne qubyr jóndeýdi úırenip júr
ASTANA. KAZINFORM - Áıelder jańa daǵdylardy ıgerip, óz betinshe bilim alýda óte belsendi. Buǵan Skills Enbek platformasynyń statıstıkasy dálel bola alady. Máselen, platforma iske qosylǵan sátten bastap (2021 jylǵy shildeden 2024 jylǵy naýryzǵa deıin) oqytýdan sátti ótken 313 myń paıdalanýshynyń shamamen 58%-y nemese 183 myńy – qazaqstandyq názik jandar.
Bul rette áıelder kóbinese kásipkerlik negizderi, tigý men satýdyń negizgi daǵdylary, Motion design, UI/UX design, múgedekterge arnalǵan jeke kómekshiler, balalardy kútý jáne damytý jónindegi mamandar syndy jáne t. b. kýrstardy tańdap, támamdaǵan.
Qazirgi ýaqytta platformada 29 myń áıel bilim alyp júr.
Onyń ishinde 258 áıel — «Dánekerleý óndirisiniń negizderi», «Avtomobıl kóliginde tasymaldaýdy uıymdastyrý», «Jylý jelileriniń jabdyqtaryna, qubyrlary men armatýralaryna qyzmet kórsetý jáne jóndeý», «Elektr jabdyqtaryna qyzmet kórsetý jáne jóndeý boıynsha elektr slesarlyq jumystar», «Qazandyq agregattaryna qyzmet kórsetý jáne jóndeý» tehnıkalyq baǵyty boıynsha kýrs tyńdaýshylary.
«Áıel adam kez kelgen ýaqytta mansap jolyn ózgerte alady: burynnan tanys salada belgili bir mamandyqty tańdap nemese bárin jańadan bastaı alady. Onlaın kýrstardyń arqasynda osyndaı ózgerister odan saıyn qoljetimdi ári jeńil. Búgingi tańda áıelderdi kez kelgen kásipten tabýǵa bolady, olar da erler sııaqty birdeı tańdaý múmkindigine ıe, sondyqtan erlerden qalyspaı, solarmen birge bıikterdi baǵyndyrady. Biz Skills Enbek platformasy adamnyń jynysyna nemese áleýmettik mártebesine qaramastan barshaǵa sapaly bilim alýǵa múmkindik berý arqyly qosymsha bilim berý salasyndaǵy praktıkalyq genderlik teńdikke yqpal etetinin maqtan tutamyz», — dep atap ótti Eńbek resýrstaryn damytý ortalyǵy basqarýshy dırektory Olga Kıseleva.
Áıelder belsendi túrde bilim alyp qana qoımaı, Skills Enbek-te kýrstar jasaýǵa da yqpal etetinin aıta ketý kerek.
Máselen, áıelder jasaǵan kýrstar — shamamen 92 saǵat.
Barlyq avtor áıelder qarjy jáne býhgalterlik esep, jeke qyzmetter men servıs, óndiris, satý jáne IT tehnologııalary boıynsha 20-dan astam kýrstar jasady.
Esterińizge sala keteıik, Skills Enbek qazaqstandyqtarǵa jańa daǵdylardy ıgerýge nemese qoldanystaǵy daǵdylardy jetildirýge múmkindik beretin túrli salalarda tegin jáne aqyly kýrstardyń keń aýqymyn usynady.
Platformada barlyǵy 380 myń qazaqstandyq tirkelgen, onyń 25 myńy 2024 jyly tirkelgen.
Skills Enbek kýrstarynyń sany 477-ge jetti, onyń 243-i tegin. 2023 jyldyń jeltoqsan aıynan bastap kýrstyq oqytý Enbek mobıldi qosymshasy arqyly qoljetimdi.
Ony Google Play jáne App Store dúkenderinen júktep alýǵa bolady.
