Áıelder arasyndaǵy «GGG» jaraqat aldy: Aıqasy keıinge shegerildi

ASTANA. QazAqparat - Qazaqstandyq Aıda Satybaldınova (3-0-1) óz jankúıerlerine qolyn jaraqattap alǵanyna baılanysty jekpe-jegi keıinge  aýystyrylatyny týraly málim etti, dep habarlaıdy Sports.kz.

«Sálem, dostar! 15 maýsymǵa josparlanǵan jekpe-jegimniń bolmaıtynyn habarlaǵym keledi. Bul jekpe-jek qolymdy jaraqattap alýyma baılanysty shildege aýystyryldy. Sońǵy sátke deıin qolym jazylyp, 15 maýsymda bokstasamyn dep oıladym. Sondyqtan, buryn bul týraly habarlaǵan joqpyn, biraq dáriger maǵan tyıym salyp, 2 apta boıy demaldyrýymdy surady. Sondyqtan, meni rıngte 7 shildede kóretin bolasyzdar. Habarlasyp, ýaıymdap jatqandaryńyzǵa rahmet. Bári jaqsy, jýyq arada kezdesemiz! Alǵa, Qazaqstan!», - dep jazdy Satybaldınova Instagram paraqshasynda jaraqattanǵan qolynyń sýretin sala otyryp.

Eske salaıyq, budan buryn qazaqstandyq boksshy qyz 7 shildede eń iri jáne mańyzdy jekpe-jegi ótetinin aıtqan bolatyn. Onda NABF tujyrymy boıynsha álem chempıony Selına Barrıospen aıqasady. Jekpe-jek keshtiń basty aıqasy bolmaq. Ol 8 raýndtan turady jáne Tehas shtaty Korpýs-Krıstı qalasynda ótedi.