«Áıelder arasyndaǵy GGG» týraly derekti fılm túsirildi
ASTANA. QazAqparat - Tanymal qazaqstandyq dokýmentalıst Qanat Beısekeev jelide jańa fılmin jarııalady. Lentanyń bas keıipkeri - boksshy Aıda Satybaldınova, dep habarlaıdy «SPORTINFORM» SAA.
Fılm «Lady Sparta». LA-daǵy kásibı áıelder boksy» dep atalady. Onda ol óziniń ómirin, boksqa qalaı kelgenin jáne aldaǵy josparlary týraly baıandaıdy.
«Aıda boksqa 25 jasynda kelgen, bul bokstaǵy mansab úshin úlken jas. Soǵan qaramastan, búginde ol AQSh-tyń kásibı rıngterinde aıqasýda jáne barlyq beldikter men tıtýldardy jeńip alýdy armandaıdy», - delingen vıdeo sıpattamasynda.
«Áıelder arasyndaǵy GGG» atanǵan Aıda kásipqoı boksta alty kezdesý ótkizgen, onyń rekordy - 4-1-1, 1KO. Ol bıylǵy shilde aıynda amerıkalyq Selena Barrıostan (5-0, 2KO) nokaýtpen jeńilip qalǵan edi. Biraq 31 jastaǵy qazaqstandyq boksshy 29 qyrkúıekte meksıkalyq Veronıka Valterramen ótken aıqasta ekinshi raýndta tehnıkalyq nokaýtpen jeńiske jetti.
26 jastaǵy Qanat Baısekeev birqatar derekti fılmderdiń avtory. Olardyń arasynda «Alysqa qatynaıtyn júrgizýshi», «Brýklındegi qazaq polıtseıi» fılmderi, sondaı-aq AQSh azamattary asyrap alǵan qazaqstandyq balalardyń ómiri baıandalǵan «Bala» kartınasy bar.
