Áıelder arasynda temeki shegýshilik jyldan jylǵa artýda - baspasóz máslıhaty
ALMATY. Mamyrdyń 26-sy. QazAqparat /Názıra Eleýhan/ - Qazaqstanda áıelderdiń shamamen 9,8 paıyzy temeki shegedi, jyldyn jylǵa onyń kórsetkishi artýda. Temeki shegýdiń eń joǵary deńgeıi 20-29 jáne 40-49 jas toptarynda.
Bul týraly búgin Almatyda Dúnıejúzilik temekisiz kúnge arnalǵan «Qazaqstandaǵy áıelder arasyndaǵy temeki shegýshiliktiń ósýi: ahýaly men saldary» atty taqyrypta ótken baspasóz máslıhatynda Salaýatty ómir saltyn qalyptastyrý problemalary Ulttyq ortalyǵynyń dırektory Sáýle Dıqanbaeva málim etti, dep habarlaıdy QazAqparat.
Onyń aıtýynsha, temeki shegýshi áıelderdiń sany erlermen salystyrǵanda 2004 jyly 1-de 5-ti, búginde 1-de 3-ti quraıdy, al 13-15 jastaǵy topta - 1-de 2-ni quraıdy. «10 jyl buryn temeki shegýshi er balalar men qyzdardyń ara salmaǵy 1-de 5-ti, keı jerlerde 1-de 10-dy quraǵan. Áıelder arasyndaǵy temeki shegýshiliktiń eń joǵary dárejesi 18-19 jas (20%) jáne 20-29 jas (17,2%) toptarynda anyqtaldy», dedi ol.
Sáýle Dıqanbaevanyń pikirinshe, áıelderdi temeki shegýshilikke qyzyqtyrýda temeki kompanııalarynyń jarnamalyq marketıngi úlken ról atqarýda. «Mysaly, sońǵy jyldary Qazaqstandaǵy temeki kompanııalary sıgaretterdiń «áıelderge ǵana» arnalǵan ártúrin hosh ıistermen, sándi ásem qaptamalarmen, shyǵaryp, taýar belgilerin 2 esege ósirip otyr».
Ol sonymen qatar, temeki shegetin áıelder erlerge qaraǵanda ókpe aýrýlaryna bes ese jıi shaldyǵady, ınfarkt mıokardy, tahıkardııa (júrektiń jıi soǵýy) syndy júrek aýrýlaryna ushyraý qaýip- qateri artatyndyǵyn, sondaı-aq, aǵzanyń tez qartaıýyna ákelip soqtyratynyn aıtty.
Dúnıejúzilik densaýlyq saqtaý uıymynyń derekteri boıynsha, álemde áıelderdiń 12 paıyzy temeki shegedi. Temeki shegýshiliktiń áıelder arasynda eń kóp taraǵany Danııada anyqtalǵan - 37 paıyz. Eń kóp temeki shegýshiler mekendeıtin damýshy elderde áıelderdiń 7 paıyzy temeki shegedi eken.
