Áıelder arasynda GGG atanǵan qazaq arýy kelesi jekpe-jegi qashan ótetinin jarııalady
ASTANA. QazAqparat - Qazaqstandyq boksshy Aıda Satybaldınova kezekti jekpe-jektiń ótetin kúnin jarııalap, barlyq jankúıerlerin Los-Anjeleske shaqyrdy, dep xabarlaıdy QazAqparat tilshisi.
"Sálem, dostar! Aldaǵy jekpe-jek týraly aqparatpen bóliseıin dep edim. 28 sáýir kúni Los-Anjeles qalasyndaǵy "Westin Bonaventure" otelinde saǵat 18:00-de meniń kezekti jekpe-jegim ótedi. Barlyqtaryńyzdy osy shoýǵa shaqyramyn. Men qatty daıyndalyp jatyrmyn. Sondyqtan taǵy tamasha bir jekpe-jekti kórsetemin dep oılaımyn", - dep jazdy A.Satybaldınova óziniń Facebook paraqshasynda.
Onyń sózine qaraǵanda, bılettiń quny - 55 dollar. Al boks keshinen keıin after-party uıymdastyrylady. Sol jerde jankúıerlerge arnaıy syılyqtar taratylatyn bolady.
Aıta keteıik, jaqynda Aıda Satybaldınova kásibı bokstaǵy alǵashqy jekpe-jegin ótkizgen bolatyn. AQSh-tyń Kalıfornııa shtatynda ótken boks keshinde A.Satybaldınova jergilikti boksshy Lıza Portermen bokstasty. Tórt raýndtyń qorytyndysy boıynsha eki boksshy teń tústi. A.Satybaldınova tóreshiler sheshimimen kelisken joq.
Atalǵan jekpe-jekte GGG-diń bapkeri Abel Sanches te boldy. Ol boksshy qyzben fotoǵa da tústi. Osy jekpe-jekten keıin sheteldik buqaralyq aqparat quraldary A.Satybaldınovany "áıelder arasyndaǵy GGG" dep atap ketti. Freddı Roých sııaqty tanymal promoýterler de jas qyzdy baıqap qaldy.
