Áıelder arasynda bokstan álem chempıonaty 2016 jyly elordada ótedi
ASTANA. QazAqparat - 2016 jyldyń 16-28 mamyry aralyǵynda elordada Áıelder arasynda bokstan álem chempıonaty ótedi. Qazaqstan boks federatsııasynyń habarlaýynsha, AIBA-dan chempıonattyń ótetin merzimderin qýattaǵan resmı hat kelgen.
AIBA-nyń atqarýshy dırektory Karım Býzıdiń hatynda bul merzimniń jarysqa qatysýshylarǵa sapaly daıyndyq jasaýǵa múmkindik berý úshin belgilengeni aıtylǵan.
Sonymen komandalary 16-shi mamyr kúni elordaǵa keledi. Al 17-shi mamyr kúni tehnıkalyq komıssııanyń otyrysy ótedi. Kelesi kúni sportshylar salmaq ólshep, jerebe tastalady. 19-shy mamyr kúni chempıonat resmı ashylyp, sharshy alańdaǵy jekpe-jekter 27-shi mamyrǵa deıin jalǵasady. Sol kúni jarystyń resmı jabylý saltanaty ótedi. Al 28-shi mamyr kúni komandalar elderine qaıtady.
Álem chempıonatyna árbir memleketten 10 sportshyǵa deıin qatysa alady. Biraq, Rıo de Janeıro olımpıadasyna 48-den 51, 57-den 60 jáne 69-dan 75 keli salmaq sanattarynda ǵana 3 joldama sarapqa salynady.
«Álem birinshiliginde jeńip alynǵan lıtsenzııanyń ózgelerden basymdyǵy zor. Eger, sportshy qurlyqaralyq chempıonatta olımpıadalyq kvota jeńip alǵan bolsa, odan keıin álem birinshiliginde jeńiske jetse, onda oǵan Rıoǵa joldama buıyrady. Al qurlyqtan Olımpıadaǵa reıtıngte odan keıin turǵan qyz barady», - delingen AIBA-nyń atqarýshy dırektory K.Býzıdiń hatynda.
Aıta keterligi, buǵan deıingi Ońtústik Koreıada ótken álem chempıonatyna álemniń 68 memleketinen 337 sportshy qatysqan bolatyn. Al bul jolǵy chempıonatqa Qazaqstan boks federatsııasy odan da kóp sportshy qatysady dep kútýde.
