Áıelder arasyndaǵy Myqtylar týrnıriniń barlyq fınalısteri anyqtaldy
ASTANA. KAZINFORM – Qaraǵandy qalasynda áıelder boksynan ótip jatqan «Myqtylar týrnırinyń» barlyq fınalısteri anyqtaldy.
Atalǵan jarys qarashada Iordanııada ótetin Azııa chempıonatyna irikteý bolyp sanalady. Týrnır qorytyndysy boıynsha Azııa chempıonatyna qatysatyn Qazaqstan quramasy jasaqtalady.
Bul jarystyń basty ereksheliginiń biri – qyzdarymyz birinshi ret bas kıimsiz judyryqtasyp jatyr. Bul ózgeris áıelder boksynda halyqaralyq arenada budan bylaı bas kıim bolmaıtynymen baılanysty. Sonyń ishinde jańa ereje Azııa chempıonatynan bastap engizilmek.
Burymdy boksshylar Qaraǵandyda 12 salmaq dárejesi boıynsha 48 kg, 50 kg, 52 kg, 54 kg, 57 kg, 60 kg, 63kg, 66 kg, 70 kg, 75 kg, 81 kg, +81 kg ózara myqtylardy anyqtap jatyr.
Týrnırdiń fınaldyq juptary:
48 kg. Áıgerim Sáttibaeva - Aqbota Bolat
50 kg. Alýa Balkıbekova - Gelıýsa Galıeva
52 kg. Tomırıs Myrzaqul - Jazıra Ýraqbaeva
54 kg. Elına Bazarova - Ánel Saqysh
57 kg. Vıktorııa Baıdýkova - Uljan Sársenbek
60 kg. Shahnaz Isaeva - Vıktorııa Grafeeva
63 kg. Laýra Esenkeldi - Aıda Ábikeeva
66 kg. Angelına Ganıýkova - Mılana Safronova
70 kg. Angelına Vıtova - Gaýhar Shoıbekova
75 kg. Elena Gapeshına - Valentına Halzova
81 kg. Gúlsaıa Erjan - Dıana Maǵaýıaeva
81+ kg. Eldana Tálipova - Lázzat Kúngeıbaeva
Fınaldyq jekpe-jekterdi erteń, 27 qyrkúıek kúni saǵat 12:00-de bastalady.
Esterińizge sala keteıik, osyǵan deıin Qaraǵandyda áıelder boksynan «Myqtylar týrnıri» bastalǵany týraly jazǵan bolatynbyz.
