Áıelder arasyndaǵy lıtsenzııalyq týrnırge baratyn boksshylar sparrıng arqyly anyqtalady

ASTANA. KAZINFORM — Qazaqstan áıelder quramasynyń bapkerler alqasy sáýirdiń 8-i men 10-y aralyǵynda Astanada ótetin sparrıngtik kezdesýlerge shaqyrtý alǵan boksshylardyń quramyn bekitti. Bul týraly Qazaqstan boks federatsııasynyń baspasóz qyzmeti habarlady. 

Sparrıngtik kezdesýlerdiń qorytyndysy boıynsha, bapkerler alqasy Taıland astanasy Bangkokte ótetin álemdik irikteý týrnırine qatysatyn boksshylardy anyqtaıdy. Sáıkesinshe, mańyzdy dodaǵa irikteý sparrıngteri bolǵandyqtan boksshylar óz salmaq dárejelerine saı bolýy kerek. Áıtse de, salmaq boıynsha sál aýytqýshylyqqa ruqsat etiledi. 

Sparrıngtik kezdesýlerge 4 salmaq dárejesinde 16 boksshy shaqyrtyldy. Olardyń arasynda 54 kelidegi Angelına Lýkas ta bar. Al 60 kelide sparrıng uıymdastyrylmaıtyn boldy. Óıtkeni, Italııadaǵy irikteý týrnıri kezinde jaraqat alyp qalǵan Rımma Volosenkonyń qoly áli jazylǵan joq.

Sondyqtan, bapkerler alqasy Volosenkony da jáne onyń basty básekelesi Vıktorııa Grafeevany da Bangkok básekesine qatysýy múmkin boksshylardyń qataryna qosty. Іrikteý týrnırine qaısysynyń qatysatyny keıinirek ótetin oqý-jattyǵý jıyny barysynda belgili bolady. 

50 keli:

Nazym Qyzaıbaı (1993)

Alýa Balqybekova (1996)

54 keli:

Anel Saqysh (2000)

Jaına Shekerbekova (1989)

Angelına Lýkas (1997)

Balaýsa Muzdyman (1997)

Elına Bazarova (2004)

Uljan Sársenbek (2005)

Symbat Álıasqar (2004)

66 keli:

Jasmın Qızatova (2002)

Laýra Esenkeldi (2000)

Natalıa Bogdanova (1999)

Darıǵa Shákimova (1988)

75 keli:

Gúlsaıa Erjan (2001)

Valentına Halzova (1996)

Jibek Jarasqyzy (2003)