Áıelder álemine túsken úsh jigit týraly komedııa 8 naýryz qarsańynda ekranǵa shyǵady
ASTANA. QazAqparat - Astanada rejısser Vıktor Bormotovtyń «Vse ız-za mýjıkov» komedııalyq fılminiń túsirilimi aıaqtalýǵa jaqyn, onda úsh jigit tek áıelder turatyn álemge tap bolady. Fılm úlken ekranǵa 2 naýryzda jol tartady, dep habarlaıdy QazAqparat.
«Bizdiń bastapqy oıymyz da 8 naýryz, áıelder merekesine komedııalyq týyndy jasap shyǵarý bolǵan. Oqıǵa jelisin de jeńil, kóńildi, jasaǵymyz keldi, sondyqtan menińshe, bul týyndy áıelderdiń merekelik kóńil-kúıin kóteredi dep sanaımyn. Jaqynda prokat ıelerimen ekranǵa shyǵatyn merzimin de anyqtap aldyq - ol 2 naýryz», - dep atap ótti fılmniń prodıýseri Aleksandr Sýslov QazAqparat tilshisine telefon arqyly bergen suhbatynda.
Kartına keıipkerleri áıel áleminde bolyp qaıtady. Olardy munda tóbelerine kóterip, asa qasterleıdi. Bastapqyda bul olarǵa jumaq orny sekildenedi, alaıda barlyǵy olar oılaǵandaı keremet emes eken. Jigitter qyzdardyń arasynda sultan bolǵylary keledi me, álde burynǵy ómirlerine qaıta ańsaýǵa kóshedi me!?
Fılm avtorlary komedııa óte kúlkili bolady dep sendirýde. Sıýjette kórermender úshin tosyn oqıǵalar oryn alady. Kınolenta boıynsha bir aı boıy, kúnine 12 saǵat, 50 adamnan quralatyn túsirý toby eńbek etti. Prodıýser Aleksandr Sýslovtyń aıtýynsha, túsirý kezinde kınokomanda kadrǵa birde-bir er kisiniń beınesi enip ketpeýin qadaǵalap otyrǵan.
Tipti olarǵa Astanany azdap «ózgertýge» týra kelgen. Degenmen túsirý óte qıyn boldy, ásirese kóshede júrip bara jatqan kezder erekshe aýyr túsipti. Kadrda er kisiler bolmaýy úshin joldardy jabý kerek bolǵan. Qyzdar álemin erekshe jaryq etip kórsetý úshin keıbir kólikterdi sary, jasyl, qyzǵylt túske boıaýǵa deıin barǵan.
Onyń sózine qaraǵanda, fılmge túsetin akterler jiti irikteýden ótken.
Nátıjesinde fılmge Murat Bısenbın («Reketır»), Táýekel Músilim («Mahabbatym júregimde»), Jánııa Djýrınskaıa («VÝZery»), Danııar Alshynov («Nıchego lıchnogo»), Saıa Orazǵalıeva («VÝZery»), Ásel Akbarova («Zaýal»), Temirxan Asylbek tańdalyp alynǵan.
Bunyń aldynda, túsirilim barysyn QazAqparat tilshisi baryp kórip qaıtqan bolatyn. Arnaıy reportajdy myna siltemeden oqı alasyzdar.
