Áıelder 50 jasqa tolǵanda zeınetaqy annýıtetin satyp alý quqyǵyn ıelenedi - S. Ábdenov
ASTANA. 22 qańtar. QazAqparat - Búgin Parlament Senaty Áleýmettik-mádenı damý komıtetiniń keńeıtilgen otyrysy bolyp ótti.
Onda «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasy talqylandy.
Zań jobasyn ázirleý zeınetaqymen qamsyzdandyrý týraly jáne mindetti áleýmettik saqtandyrý týraly qoldanystaǵy áleýmettik zańnamadaǵy olqylyqtardy joıý qajettigimen baılanysty bolyp otyr. Budan bólek, qujat zeınetkerlik jastaǵy adamdardy, mindetti áleýmettik saqtandyrýǵa jatatyn adamdardy áleýmettik qorǵaýǵa, túptep kelgende olardyń ómir súrý sapasy men deńgeıin jaqsartýǵa baǵyttalǵan. Bul rette jobanyń maqsaty ornalasqan jeri belgisiz burynǵy qyzmetkerlerdiń mindetti zeınetaqy jarnalary boıynsha bereshekti óteýge baılanysty problemalardy sheshý, memlekettik áleýmettik saqtandyrý qorynyń qarjylyq turaqtylyǵyn qamtamasyz etý bolyp tabylady.
«Ózgeristerdiń bir parasy Úkimettiń ártúrli normatıvtik aktilerdegi quzyretterdi bir bapqa jınaqtaýdy kózdeıdi», - dedi Eńbek jáne halyqty áleýmettik qorǵaý mınıstri Serik Ábdenov. Onyń aıtýynsha, zań jobasy boıynsha áıelder eń tómengi zeınetaqydan kem emes mólsherdegi tólemdi qamtamasyz etý úshin zeınetaqy jınaqtary jetkilikti bolǵan shaqta jáne 50 jasqa tolǵanda zeınetaqy annýıtetin satyp alý quqyǵyn ıelenedi. Eske salsaq, bundaı quqyq qoldanystaǵy zańnamada 55 jas retinde qarastyrylǵan bolatyn.
