Áıel tereń qudyqta túnep shyqty (FOTO)
ASTANA. QazAqparat - Shymkent turǵyny keleńsiz jaǵdaıǵa tap boldy. «Samal» shaǵynaýdanynyń turǵyny tún ishinde tereń shuńqyrǵa qulap qalǵan.
Shuńqyrdyń tereńdigi - 7 metr. Arnaıy qazylyp, jan-jaǵy betondalǵan. Qulaǵan azamatsha qarańǵyda baıqamaı qalsa kerek. Zardap shekken áıeldiń daýsyn tańǵy 6-dan asqanda dalaǵa shyqqan kórshileri estip, kómekke keledi. Degenmen, tereń shuńqyrdan ózderi shyǵaryp ala almaǵan soń qutqarýshylarǵa habar bergen.
Tótenshe jaǵdaı departamentiniń qutqarý qyzmeti jasaǵynyń mamandary oqıǵa ornyna jedel attanady. Buǵan qosa habar bergender jedel járdem dárigerlerine de qońyraý shalǵan bolatyn. Qutqarýshylar áıeldi arnaıy alpınıstik arqannyń kómegimen syrtqa shyǵaryp aldy.
Áıel aman. Aıaq-qoly da saý. Azdap denesin aýyrtyp, jaýrap qalǵan eken, dep habarlaıdy Otyrar. kz.
