Áıel shyndap kirisse qoǵamdy ózgerte alady - Zeınep Ahmetova

Aqtóbedegi Analar sleti elimizde alǵash ret uıymdastyrylyp, Elbasy Nursultan Nazarbaev óz quttyqtaýyn jiberdi. Óńir basshysy Berdibek Saparbaevtyń aıtýynsha, oblystaǵy depýtattardyń árbir tórtinshisi, kásipkerlerdiń árbir úshinshisi názik jandardyń úlesinde.

«Aqtóbe - qasıetti, kıeli jer. Sol jerge Bıbigúl Ahmetqyzy bastaǵan qazaqtyń batyr qyzdary keldi. Jastar aldyńǵy býynǵa qarap tálim alyp, eńbek etse, el damý jolynda bolady. Al jańa ortalyqta «Altyn alqa», «Kúmis alqa» belgileri taǵylyp, tanymdyq keshter ótedi. Sonymen qatar, biz «Ana dańqy» tósbelgisin berýdi josparlap otyrmyz. Dál osy Analar sleti ózge óńirde óz jalǵasyn tabady dep senemiz»,- dedi oblys ákimi B.Saparbaev.

Sletke qatysqan Sotsıalıstik eńbek eri, ánshi Bıbigúl Tólegenova, Qazaqstan Respýblıkasyndaǵy balalar isi jónindegi jedel ýákil Sáýle Aıtpaeva, Sotsıalıstik eńbek eri Vera Sıdorova, etnograf-jazýshy Zeınep Ahmetova sóz sóıledi.

«Áıeldiń qolynan kelmeıtini joq. Áıel shyndap kirisse qoǵamdy ózgerte alady. Áıeldi kóbine «úıde bala baǵyp, bos otyr» dep aıtyp qalady. Osyny aıtqan adamnyń aýzynan urýǵa bolady. Óıtkeni álemde ómirge perzent ákelip, bala baǵý, ósirip, qoǵamǵa azamat etip qosýdan artyq jumys joq. Áıeldiń úsh baqyty bar. Olar: qyz dáýreni, adal jar bolý, ana ataný. Aıtpaǵym, qazaq áıelderi taǵdyrly. Aqtaban shubyryndy kezinde er azamattarmen birge soǵysqa qatysyp, artynan erip, jaýyngerlerdi kıindirdi, tamaqtandyrdy. Mysal óte kóp. Erkek pen áıel eki álem. Er adam 60-70-ke kelse de ana alaqanyn ańsap turady»,- dedi Zeınep Ahmetova.

Aqtóbedegi Analar sleti kezinde qatysýshylarǵa úndeý tastaldy. Onda salaýatty ómir saltyn nasıhattaý, ana men balany qoldaý, kópbalaly jáne tolyq emes otbasyn qoldaýǵa baǵyttalǵan óńirlik baǵdarlamalar qabyldaý, bolashaq ana retinde qyzdar tárbıesine kóńil bólý, mektepter men bilim mekemelerinde qyzdar klýby men analar keńesin qurý, azamattyq nekedegi juptarǵa zańdy nekeniń quqyqtyq-múliktik basymdyqtaryn túsindirý, ata-analardyń óz balalary aldyndaǵy jaýapkershiligin arttyrý týraly jazyldy.