Áıel ota kezinde qursaǵynda qalyp qoıǵan hırýrgııalyq ıneni júkti bolǵan kezinde ǵana sezgen
ASTANA. 22 shilde. QazAqparat - Brıtanııalyq júkti áıel birneshe jyldar buryn jasalǵan ota barysynda ishinde qalyp qoıǵan hırýrgııalyq ıneni baıqaǵan,
dep habarlaıdy The Daily Mail .
26 jastaǵy Mılton-Kıngs turǵyny Kellı Donıgan (Kelly Donegan) shamamen júktiliktiń orta merziminde ishiniń sol jaq bóliginde azdap shanshý baryn sezedi. Bul jaıynda ol óziniń dárigerine aıtqan. Alaıda sońǵysy ol aýyrsynýlarǵa kóńil bólmeýge keńes beredi. Alaıda júktiliktiń jetinshi aıynda brıtandyq áıel qaryn terisin hırýrgııalyq ıne tesip shyqqanda qatty tań qalǵan. Donıgannyń aıtýynsha, ol birden 2009 jyly soqyr ishekke jasalǵan ota týraly eske túsiredi. Áıeldiń oıynsha, ıne onyń qursaǵyna dál sol ota kezinde qalyp qoıǵan bolý kerek.
Donıgan qaıtadan dárigerge kórinedi, alaıda mamandar ıneni osy kezeńde alyp tastaýǵa bolmaıtynyn alǵa tartady. Júktilik sebepterine baılanysty oǵan ota jasaý túgili, ıneniń kólemi men ornalasý jaǵdaıyn anyqtaýǵa septigin tıgizetin rentgendi paıdalanýǵa da bolmaıdy.
Zertteý barysynda hırýrgııalyq ıne uryqqa esh zaqym keltirmegendigi anyqtaldy. Endi dárigerler áıel bosanǵannan keıin ǵana, onyń ish qýysynan bóten deneni alyp tastaý boıynsha ota jasaıtyndyqtaryn málimdep otyr.
