«Áıel - ómir tiregi»- respýblıkalyq basylymdarǵa sholý
***
Keshe Aqordada Elbasy Nursultan Nazarbaev qazaqstandyq áıelder qaýymy arasynan elimizdiń ishi-syrtynda ómirdiń ár salasy boıynsha qıly-qıly tabystarǵa jetip júrgen bir top arýlardy 8 naýryz - Halyqaralyq áıelder kúni merekesine oraı qabyldady. Osyǵan oraı «Egemen Qazaqstan» gazetinde «Áıel - ómir tiregi» degen taqyryppen maqala basyldy. Basylymnyń atap ótýinshe, arýlardy jyly júzben qarsy alyp, merekelerimen shyn júrekten quttyqtaǵan Elbasy Nursultan Nazarbaev olar arqyly barlyq qazaqstandyq áıelderdi, aq jaýlyqty analar men halqymyzdyń súıikti, súıkimdi qyzdaryn quttyqtap otyrǵanyn eskertti. «Búgingi kúni densaýlyq saqtaý salasy men bilim berý júıelerinde áıelderdiń úlesi 90 paıyz. Shaǵyn bıznesti qoldaýǵa bólingen nesıelerdiń 40 paıyzyn da áıelder alady. Qalaı desek te, álemdi er azamattar bılegenimen, erdi áıel bıleıdi. Biraq er azamattar áıelge kúrdeli qyzmetterdi júktegisi kelmeıdi, osynyń ózi durys emes. Ózimniń ómirlik mol tájirıbemnen baıqaǵanym, er azamattar durys atqara almaǵan sharýalardy áıelderge júkteseń árqashanda tártip ornap, jańa ıdeıalar týyp, nátıjesinde jaqsy tabystarǵa qol jetkiziledi», - dedi Prezıdent.
«Egemen Qazaqstan» gazetiniń jazýynsha, Densaýlyq saqtaý mınıstri Salıdat Qaıyrbekova Qostanaı oblysynda eki kúndik saparmen boldy. Ol aldymen Meńdiǵara aýdanyna baryp, aýdandyq aýrýhanany, Birinshi maı aýylyndaǵy selolyq-dárigerlik ambýlatorııany, selolyq dárihanalardy aralady. Selodaǵy densaýlyq saqtaý isiniń qalaı júrip jatqanyn óz kózimen kórip, aýrýhana ujymymen kezdesti. Mártebeli qonaq saparynyń ekinshi kúnin Qostanaı qalasyndaǵy kóp salaly aýrýhanany aralaýdan bastady. Ondaǵy ozyq tehnologııamen jumys isteıtin qymbat sheteldik medıtsınalyq quraldardy kórdi. Sondaı-aq, mınıstr qalalyq perzenthana men oblystyq onkologııalyq dıspanserge bardy.
***
Almaty stýdentteri keshe erekshe aktsııa ótkizip, shylym shegetin qyzdarǵa temekilerin gúlmen almastyrýdy usynǵan. Bul jaıynda «Vremıa» gazetinde jaryq kórgen «Dlıa nejnyh ı krasıvyh» degen taqyryptaǵy mqalada keńinen baıandalǵan. Aktsııany uıymdastyrýshylardyń biri Rýslan Malahovtyń aıtýyna qaraǵanda, sońǵy ýaqytta shylym shegýdi sán kóretin qyzdardyń qatary eselene túsken. «Bizdiń fleshmobtyń basty maqsaty áıelderge temeki ustaǵannan góri gúlmen ádemi kórinetindigi eske túsirý. Árıne, biz bir aktsııa aýqymynda temeki shegý problemasynyń sheshilmeıtindigin bilemiz, degenmen bul jegi qurtpen kúresti qandaıda bir joldarmen bastaý qajet qoı», - dedi ol.
***
«Kazahstanskaıa pravda» gazetiniń jazýynsha, keshe Magnıtogorsk qalasynda ótken pleı-off serııasyndaǵy match barysynda elimizdiń «Barys» hokkeı klýby muz aıdynynyń qojaıyny «Metallýrg» komandasyna 3:4 esebimen ese jiberdi. Kelesi oıyn erteń elorda tórinde ótpek.
***
QR Ulttyq bankiniń tóraǵasy Grıgorıı Marchenko genderlik teńdikti jaqtaıdy. Bul jaıynda «Ekspress-K» gazetinde jaryq kórgen «Pensıon blagorodnyh devıts» degen taqyryptaǵy maqalada keńinen baıandalǵan. Basylymnyń atap ótýinshe, elimizdiń bas bankıriniń Dúnıejúzilik bank derekterine silteme jasap alǵa tartqan derekterine sáıkes elimizde zeınetkerlikke shyqqannan keıin áıelder 20,5 jyl, al erkekter 12 jyl ómir súredi eken. G.Marchenkonyń paıymynsha, bul áıelderdiń zeınetkerlikke shyǵý jasyn 63-ke deıin kóterýge negiz bola alady.
