Áıel kýrerlerge quqyqtyq ári psıhologııalyq kómek kórsetiledi
ASTANA. KAZINFORM — Qazaqstan Respýblıkasynyń Eńbek jáne halyqty áleýmettik qorǵaý mınıstrligi, Yandex Qazaqstan kompanııalar toby jáne «Іsker» qoldaý ortalyǵy» qoǵamdyq qory áıel kýrerlerge áleýmettik qoldaý kórsetý tetikterin damytýǵa baǵyttalǵan úshjaqty ózara yntymaqtastyq týraly memorandýmǵa qol qoıyldy. Bul týraly vedomstvonyń baspasóz qyzmeti málim etti.
Qujatqa QR Eńbek jáne halyqty áleýmettik qorǵaý mınıstri Askarbek Ertaev, «Yandex Qazaqstan» kompanııalar tobynyń basshysy Tımýr Shalekenov jáne «Іsker» qoldaý ortalyǵy» qoǵamdyq qorynyń dırektory Tolqyn Sametova qol qoıdy.
Qazir adamdardyń tabys tabý tásili de ózgerip keledi. Sonyń biri — tsıfrlyq platformalar arqyly jumys isteý. Mundaı eńbek túri Qazaqstan Respýblıkasynyń zańnamasymen retteledi. Memleket jańa formatta jumys isteıtin azamattardyń áleýmettik qorǵalýyn kúsheıtý baǵytynda tıisti jumystar júrgizip keledi.
— Jańa joba — qıyn nemese daǵdarysty jaǵdaıǵa tap bolǵan áıel kýrerlerge naqty kómek kórsetýge baǵyttalǵan. Negizgi maqsat ár otbasynyń jaǵdaıyn jeke qarastyryp, áıelderge qajetti qoldaý men tıisti qyzmetterdi alýǵa kómektesý, — delingen habarlamada.
Memorandým aıasynda taraptar ózderiniń múmkindikteri men tájirıbesin biriktirmek. Birlesken jumys birneshe baǵytty qamtıdy. Atap aıtqanda, áıelderdiń quqyqtyq jáne qarjylyq saýatyn arttyrý, memlekettik áleýmettik qoldaý sharalary týraly aqparat berý, qajetti áleýmettik qyzmetterdi alýǵa járdemdesý, bilim berý jáne aqparattyq baǵdarlamalarǵa qatysýyna kómektesý kózdelip otyr. Qajet bolǵan jaǵdaıda áıelderge quqyqtyq, psıhologııalyq jáne gýmanıtarlyq kómek kórsetý, qoldanystaǵy tártip pen uıymdardyń múmkindigine qaraı medıtsınalyq kómek alýǵa járdemdesý múmkin de qarastyrylǵan.
Kómektiń naqty túri men kólemi ár adamǵa jeke belgilenedi. Bul rette áıeldiń ómirlik jaǵdaıy, otbasynyń qajettiligi jáne jobanyń talaptary eskeriledi.
Eńbek mınıstri naryq ózgerisine saı jańa jumys túrlerin jetildirý azamattardyń ekonomıkalyq belsendiligin arttyrýǵa jáne áleýmettik qorǵalýyn qamtamasyz etýge negiz bolatynyn atap ótti.
— Búginde eńbek salasy jańa ózgerister kezeńin bastan ótkerip otyr. Memlekettik saıasat ta osy úderisterdi nazarǵa alyp, soǵan saı beıimdelýi qajet. Bizdiń basty mindetimiz azamattardyń qandaı qyzmet túrimen aınalysatynyna qaramastan, zań aıasynda jumys istep nemese tabys taýyp júrgen ár adamǵa túsinikti ári qoljetimdi qoldaý tetikterin qalyptastyrý. Bul bastama memlekettik organdar, bıznes ókilderi men qoǵamdyq uıymdardyń ózara yntymaqtastyǵy arqyly naqty áleýmettik máselelerdi sheshýge bolatynyn kórsetedi. Áńgime kásibı qyzmeti men otbasylyq mindetterin qatar atqaryp júrgen áıel kýrerlerge qajetti jaǵdaı jasaý jáne olardy qoldaý týraly bolyp otyr. Qıyn jaǵdaıǵa tap bolǵan kezde tıisti kómekke jedel qol jetkizý úshin qaıda júginý keregin bilý asa mańyzdy, — dedi Asqarbek Ertaev.
Yandex Qazaqstan kompanııalar tobynyń basshysy Tımýr Shalekenov tsıfrlyq platformalar arqyly qyzmet kórsetetin azamattarǵa áleýmettik qoldaý kórsetý tetikterin jetildirý kompanııanyń basym baǵyttarynyń biri ekenin jetkizdi.
— Tsıfrlyq servıster men ıkemdi jumys formaty azamattarǵa jańa múmkindikter ashyp otyr. Alaıda qıyn jaǵdaıǵa tap bolǵan kezde qajetti áleýmettik qoldaýdyń der kezinde kórsetilýi de aıryqsha mánge ıe. Osy joba aıasynda Eńbek mınıstrligi «Іsker» qorymen birlesip, áıel kýrerlerdiń qajetti aqparat pen naqty kómekke ýaqytyly qol jetkizýine jaǵdaı jasaýdy kózdep otyrmyz, — dedi Tımýr Shalekenov.
«Іsker» qoldaý ortalyǵy» qoǵamdyq qorynyń dırektory Tolqyn Sametova qıyn jaǵdaıǵa tap bolǵan otbasylarǵa qoldaý kórsetý kezinde ár adamnyń qajettiligi men jaǵdaıyn jeke qarastyrý qajet ekenin aıtty.
— Áleýmettik kómek eń aldymen adamnyń naqty jaǵdaıyn túsinýden bastalady. Joba aıasynda ár qatysýshymen jeke jumys istep, onyń qajettiligine qaraı qandaı qoldaý qajet ekenin anyqtaýdy josparlap otyrmyz. Qordyń quqyqtyq, psıhologııalyq jáne gýmanıtarlyq kómek kórsetý tájirıbesi áıelder men olardyń otbasylaryna naqty qoldaý kórsetýge múmkindik beredi, — dedi ol.
Joba ázirge pılottyq tártipte júzege asyrylady. Oǵan Yandex Go mobıldi qosymshasyndaǵy «Tamaq», Lavka jáne «Jetkizý» servısteri arqyly tapsyrys oryndaıtyn áıelder qatysa alady. Ol úshin áıel kýrerler keminde tórt apta boıy osy servısterdi paıdalanýy kerek. Sonymen qatar, qatysýshynyń qıyn nemese daǵdarysty jaǵdaıda bolýy eskeriledi.
Ótinishterdi irikteý kezinde áleýmettik qoldaýdy qajet etetin azamatshalarǵa basymdyq beriledi. Olardyń qatarynda balalaryn jalǵyz tárbıelep otyrǵan jáne kópbalaly analar, múgedektigi bar tulǵalar, erekshe qajettilikteri bar balalardy baǵyp otyrǵan analar, sondaı-aq aýyr naýqas otbasy múshesine kútim jasaıtyn jandar bar. Atalǵan sanatqa jatatyn azamattardyń ár ótinishi jeke tártippen baǵalanady jáne ár jaǵdaıdyń ereksheligi eskeriledi. Bul rette azamattyń ómirlik ahýaly, otbasynyń qajettilikteri jáne joba talaptaryna sáıkestigi negizge alynady.
Qatysý sharttary men ótinish berý tártibi týraly tolyq aqparatty Yandex Pro mobıldi qosymshasyndaǵy «Yntymaqtastyq týraly negizgi aqparat» bóliminen, «Áıel kýrerlerge kómek» maqalasynan bilýge bolady. Qosymsha aqparatty tıisti servıstiń qoldaý qyzmetinen de alýǵa múmkindik bar.
Joba ázirge pılottyq rejımde iske asyrylady. Nátıjesinde taraptar azamattardyń qoldaý sharalaryna qajettiligin zerdelep, usynylatyn kómektiń is júzindegi tıimdiligin baǵalaıdy. Osy tájirıbe keıin jobany jetildirip, qoldaý tetikterin keńeıtýge negiz bolmaq.
Mınıstrlik eńbek salasyndaǵy jańa úrdister men qoldanystaǵy zańnama talaptaryn eskere otyryp, azamattardy jumyspen qamtý jáne áleýmettik qoldaýdy kúsheıtýge baǵyttalǵan tıimdi tetikterdi jetildirýdi jalǵastyrady.
Eske sala keteıik, Eńbek jáne halyqty áleýmettik qorǵaý mınıstri Asqarbek Ertaev Almatyda qolyndaǵy kishkentaı balasymen kýrer qyzmetine kirgen áıeldiń oqıǵasynan keıin elimizde kýrer qyzmetine qabyldaýdyń biryńǵaı qaǵıdasy qabyldanatynyn aıtqan bolatyn.
