Áıel quqyǵyn shekteıtin mentalıtetimizge jat úrdisterge boı aldyrmaý kerek – Prezıdent
«Bilim kýltinen bólek, progressıvti eldiń taǵy bir mańyzdy belgisi – áıeldiń qoǵamdaǵy mártebesi. Sondyqtan biz áıelderdiń quqyǵyn qorǵaýǵa erekshe nazar aýdarýymyz kerek. Sońǵy jyldary bul máselede aıtarlyqtaı ilgeri jyljydyq. Otbasylyq-turmystyq zorlyq-zombylyq úshin jaýapkershilikti kúsheıtý men eńbektegi kemsitýshilikti joıý úshin keshendi sharalar qabyldandy», - deıdi Memleket basshysy.
Onyń aıtýynsha, elimizde ana men bala tárbıesi úshin jaǵdaı jaqsardy. Memleket júıeli deńgeıde áıelderdiń saıasatqa, memlekettik basqarýǵa, bızneske qatysý múmkindikterin keńeıtip keledi.
Jahandyq reıtıngilerge sáıkes, Qazaqstan genderlik teńdik boıynsha Sıngapýrmen, Ońtústik Koreıamen, Japonııamen, Birikken Arab Ámirlikterimen bir deńgeıde turaqty túrde Azııanyń jetekshi elderi qataryna kiredi.
«Bizdiń tarıhymyzda áıelder árdaıym mańyzdy ról atqarǵan jáne qoǵamda erekshe oryn alǵan. Uly dalanyń qyzdary halqymyzdyń mádenı dástúrleri men rýhanı-adamgershilik qundylyqtaryn saqtap keldi. Sondyqtan progress pen jasampazdyq jolynda alǵa jyljyp, áıelderdiń quqyǵyn shekteıtin mentalıtetimizge jat úrdisterge boı aldyrmaýymyz kerek», - dedi Qasym-Jomart Toqaev.
