Áıel quqyǵy jaǵynan Qazaqstan álemniń damyǵan 30 eliniń qatarynda - general S.Aıtpaeva
Shyndyǵynda, áıel - otbasynyń uıytqysy, ol otbasynda ǵana emes, jalpy qoǵamda da beıbitshilik pen tynyshtyqtyń shyraqshysy sanalady. «Áıel - bir qolymen besikti, ekinshi qolymen álemdi terbetedi» degen de, sony bildirse kerek. Osyndaıda Memleket basshysynyń: «Áıel sheksiz qudiret ıesi. Tarıh taǵylymynda eń aıtýly ózgeristerdiń barlyǵy áıelderdiń qolymen nemese áıelder úshin jasalady», - degen sózi eske oralady.
Qazirgi zamanda áıelder qaýymy qoǵam men memleket isine kelgende er azamattardan kem belsendilik tanytyp otyrǵan joq. ıAǵnı, áıel azamattar tek otbasy tóńireginda ǵana emes, sonymen qatar memlekettik qyzmette, bızneste, densaýlyq saqtaý men bilim-aǵartý júıesinde jemisti jumys istep jatyr. Sonaý qıyn jyldary eldiń eńsesin kóterýge atsalysýdan bastap, búgingideı el ekonomıkasynyń qaryshtaýyna áıelder qaýymynyń qosqan úlesi sheksiz. Olardyń sońǵy ýaqytta qoǵamdyq jumysqa etene aralasýy baıqalyp, saıası qyzmetterde ósýi bekidi, memlekettik qyzmetterde de názik jandylardyń salmaǵy aıtarlyqtaı artyp keledi.
Osyndaıda, qazaqstandyq áıelderdiń basym bóligi «asyl jandarǵa tán emes» dep sanalatyn eń kúrdeli ári qıyn mamandyqtardy ıgerip qana qoımaı, onda tańdaı qaqtyratyn tabystardy eńserip júrgenin de eske salǵanymyz oryndy. Memleket isinde joǵary, jaýapty qyzmetter atqaratyn áıelder qaýymy ózderiniń bilikti basshylyǵymen erekshelinip qana qoımaı, Otanymyzdyń jetistikterine de tyń dem berýde.
Aıta keterligi, Táýelsizdik alǵan kúnnen beri Qazaqstanda maqsatty túrde genderlik saıasat saýatty júzege asyrylyp keledi. Munyń arqasynda áıelderge ózderiniń kásibı jáne shyǵarmashylyq áleýetterin júzege asyratyndaı tolyq múmkindikterge jol ashyldy. Dál osy baǵyttaǵy memlekettik saıasatqa Tuńǵysh Prezıdent-Elbasy Nursultan Nazarbaev ta udaıy mán berip, ana men balanyń áleýmettik qorǵalýyna, otbasy qundylyqtarynyń birinshi kezekte qaralýyn nazarǵa alyp, osy máselelerdi udaıy qoldap keledi. Buǵan Memleket basshysynyń elimizdegi túrli salalarda abyroıly qyzmetimen kózge túsip júrgen názik jandylardy quttyqtaýy da dálel. Elbasynyń 8 naýryz qarsańyndaǵy dástúrge aınalǵan saltanatty qabyldaýynda Qazaqstandaǵy ártúrli mamandyq ıeleri - sala basshylary, áskerı qyzmetkerler, bıznesmender, dáriger, muǵalimder, mádenıet qaıratkerleri bolady.
Al osyndaı adamgershiligi men jan-jaqty kásibıliginiń arqasynda Prezıdent N. Nazarbaevtyń qurmet, sharapatyna bólengen qazaqstandyq áıelderdiń biri - Sáýle Aıtpaeva. Sáýle Muhanbedıanqyzy Aıtpaeva qazir Qazaqstan Respýblıkasy Bas prokýratýrasynyń Quqyqtyq statıstıka jáne arnaıy esepke alý komıtetiniń tóraıymy laýazymynda.
Ol Torǵaı oblysynyń (qazir Aqmola oblysy) Jaqsy kentinde týǵan. Sáýle Muhanbedıanqyzynyń jetken jetistikteri men ómirlik jolynyń ózi qazaq áıeline tán qajyrlylyqty, zor talant pen eńbekqorlyqty ańǵartsa kerek.
Sáýle Muhanbedıanqyzy Reseıdiń Sverdlovsk zańgerler ınstıtýtyn támamdaǵannan soń, prokýratýra qyzmetkerlerine tán mansaptyq baspaldaǵynyń barlyq satysynan ótti. Eńbek jolyn Aqmola oblysy men Tselınograd qalasynyń Lenın aýdanyndaǵy prokýratýradan bastalady. Keıinnen QR Bas prokýratýrasynyń Quqyqtyq statıstıka jáne aqparat ortalyǵynda qyzmet etti. 2003 jyly Bas prokýratýranyń Quqyqtyq statıstıka jáne arnaıy esepke alý komıtetinde tóraǵanyń birinshi orynbasary qyzmetine taǵaıyndalǵan bolatyn. Al 2012 jyldyń sáýirinen bastap osy vedomstvonyń basshylyǵynda. Sáýle Muhanbedıanqyzy «Eren eńbegi úshin» medalimen marapattalyp, «Qazaqstan Respýblıkasy prokýratýrasynyń qurmetti qyzmetkeri» ataǵyna laıyqty dep tanylǵan.
Tynymsyz eńbegi men zor talantynyń arqasynda Sáýle Aıtpaevanyń mansaptyq baspaldaqtarymen qatar synyptyq shenderi de joǵarylady, arnaýly ataqtary men laýazymdary da qatar ósti. Máselen, S. Aıtpaeva aǵa ádilet keńesshisi, 3-dárejeli Memlekettik ádilet keńesshisi atandy.
Eń bastysy, Sáýle Muhanbedıanqyzy - Táýelsiz Qazaqstan Respýblıkasynyń tarıhyndaǵy general shenin ıelengen tuńǵysh áıel. Mundaı joǵary áskerı shendi oǵan 2013 jyldyń 7 mamyrynda Otan Qorǵaýshylar kúnine oraı Prezıdent N. Nazarbaev tapsyrǵan edi.
«Men áıelderge, onyń ishinde quqyq qorǵaý qyzmetkerleri arsyndaǵy názik jandylarǵa osyndaı shender alý múmkindigin ıelengen azamattardyń alǵashqysy bolǵanyma qýanyshtymyn ári osyny maqtan tutamyn. Bunyń ózi Mánshúk pen Álııadaı Otanyn súıip, soǵan qaltqysyz qyzmet etetin urpaqtyń ósip kele jatqanyn bildiredi. Jalpy, negizi tabıǵatynan áıel adam jaýapkershil bolyp keledi, olar beıbitshilikti súıedi, qaýipsizdik pen tynyshtyqty olardyń jany árqashan qalap turady. Sondyqtan da, meniń oıymsha áıel azamatshalarynyń quqyq qorǵaý organdaryndaǵy qyzmeti konstıtýtsııalyq quqyqtardyń múltiksiz qorǵalýyna, barsha adamdardyń tek jadyrap júrýleri men árqashan ózderin baqytty sezinýleri úshin qosymsha ynta, senim beredi dep oılaımyn», - deıdi general Sáýle Muhanbedıanqyzy.
Ol elimizde dál osyndaı múmkindikter jasalyp, áıelder qaýymyna udaıy qamqorlyq kórsetkeni ári genderlik saıasattaǵy elimizdiń ilgerileýshilikteri úshin Memleket basshysyna sheksiz rızashylyǵyn bildirip keledi.
Óziniń qaramaǵynda 600-den astam qyzmetker jumys isteıtin general Sáýle Aıtpaeva: «Qandaı bolmasyn qyzmette eń bastysy - ózara túsinistik, senim men árbir qyzmetkerdiń óz ómiri úshin jaýapkershiligi», - dep sanaıdy.
«Bizdiń ata-babalarymyz, ájelerimiz ben analarymyz arman etken Táýelsizdikti alǵan kúnnen bastap, memlekettik saıasatymyz ben ustanǵan baǵytymyz da naqty aıqyndaldy. Al memleketimizdegi genderlik saıasat ulttyq salt-dástúrler negizinde qurylyp, sonyń dińgeginde qalyptasyp keledi desem artyq aıtqandyq emes. Sonymen qatar, mundaı saıasatqa burylǵan baǵdar Elbasynyń bastamasymen aıqyndalǵanyn da barshamyz jaqsy bilemiz. Bizdiń búgingi tirshiligimiz Ata Zańnan arqaý alady desek, osy Konstıtýtsııanyń 27-babynda «neke jáne otbasy, ata-analar men balalar memleket qorǵaýynda bolady» dep jazylǵan. Elbasy Nursultan Nazarbaev halyqty baspanamen qamtý, ulttyń densaýlyǵyn jaqsartý, bilimin arttyrý, halyqty eńbekpen qamtý sekildi áleýmet úshin mańyzdy máselelerdi eshqashan esten shyǵarǵan emes. Osynyń bári túptep kelgende, otbasynyń berekeligi, yntymaǵy úshin atqarylatyn qamqorlyq. Mundaı mańyzdy máselelerdiń barlyǵy Prezıdent N. Nazarbaevtyń jyl saıynǵy halyqqa jarııalaǵan Joldaýlarynda kórinis taýyp keledi. Osyndaı problemalardy sheshý úshin arnaıy zańnamalyq aktiler men qujattar qabyldanýda. Al áıelderdiń konstıtýtsııalyq quqyǵynyń qorǵalýyna eń senimdi kepil - bul Prezıdent», - deıdi general Sáýle Aıtpaeva.
Onyń oıynsha, búgingi tańda bizdiń elimizde áıel quqyǵynyń senimdi túrde zańnamalyq deńgeıde qorǵalýynyń tetikteri tolyq ári jan-jaqty qamtylyp otyr.
Qazaqstandyq tuńǵysh general-áıel S.Aıtpaeva Elbasynyń qamqorlyǵyna jaýap retinde qazaqstandyq áıelder de eldik damýdyń ár salasynda qomaqty úles qosyp jatqanyn alǵa tartady. Áıelder memleketimizdiń eń mańyzdy salalarynda, atap aıtqanda keleshek jas urpaqty tárbıeleıtin pedagogıka salasynda qyzmet etip keledi. Búginde, pedagogtardyń 73 paıyzy - áıelder. Ult saýlyǵyna jaýap beretin medıtsına qyzmetkerleriniń 87 paıyzy da áıelderden turady. Bıýdjettik salanyń 60 paıyzyn da áıelder quraıdy.
«Osynyń ózi áıelderdiń búkil qoǵam ómiriniń ózegi men tiregine aınalǵanyn kórsetip otyr. Basqasyn aıtpaǵannyń ózinde, prokýratýra organynda myńnan astam áıelder jemisti jumys isteýde», - dedi S. Aıtpaeva.
Bul rette, general Sáýle Muhanbedıanqyzy Qazaqstanda áıelderdiń teń quqylyǵy kórsetkishi boıynsha eń damyǵan 30 eldiń qataryna enip otyrǵanyna ábden senimdi. Bul memlekettik deńgeıde mejelengen maqsattardyń biri emes pe? Shyndyǵynda, Sáýle Aıtpaeva sekildi qazaq áıelderiniń arqasynda Elbasy aıqyndaǵan asýdy eńserý de ońaı bolatyny sózsiz.