Áıel quqyǵyn qorǵaıtyn fılm jaryqqa shyqty

Bul — áıelge zorlyq kórsetýdiń jáne jalpy qylmys jasaýdyń aýyr saldary qandaı ekenin kórsetetin týyndy. Kıno qurbandardyń aıanyshty taǵdyry, jaǵymdy keıipkerlerdiń is-áreketi men tabandylyǵy jáne jaǵymsyz obrazdardyń pasyqtyǵyn beıneleý arqyly ár qylmystyń óteýi jaza ekenin jetkizedi.

Jabyq kórsetilim bastalmastan buryn fılmde bas qaharman Álııanyń rólinde oınaǵan Zarına Karmen suhbat berdi.

— Men somdaǵan bas keıipker — shynshyl, óz mamandyǵyna adal jan. Emotsııaǵa jıi beriledi. Óziniń otbasy joq, sondyqtan shyǵar minezdi. Meniń degenim durys dep óz aıtqanymen júredi. Sondaı bolmysynan jańylysyp, súrinedi. Biraq sodan sabaq alyp, ornynan turyp, basqa jol tabady, isin ary qaraı jalǵastyrady. Óner adamdy tárbıelemeıdi, emotsııa beredi. Árkim kınodan ózine keregin alady. Biz óte mańyzdy ári qoǵamda kóp aıtylmaıtyn taqyrypty kóterdik. Qansha qyz-kelinshek zorlyq kórip, biraq sony «uıat bolady» degen túsinikpen aıta almaı, ishteı tynyp, ishteı órtenip júredi. Alaıda ondaı nárse aıtylýy kerek. Fılmniń basty jetkizetin ıdeıasy — osy, — dedi aktrısa.

Al kınony túsirgen rejısser Qýanysh Stahanovtyń sózinshe, oqıǵa oıdan qurastyrylǵan. Biraq shynaıy ómirde de áıelderdiń zorlyq kórý oqıǵalary, ókinishke qaraı, az bolatyn jaǵdaı emes. Sondyqtan, rejısserdiń pikirinshe, bul — ózekti taqyryp.

— Bul — klassıkalyq detektıv janryndaǵy týyndy. Jalpy, detektıv — óner jolyndaǵy meniń súıikti baǵytym. Osy janr arqyly qoǵamdaǵy mańyzdy máselelerdiń birin kóterdik. Áıelge zorlyq-zombylyq jasaýǵa qarsy kúresti kórsettik, — dedi ol.

Fılm Mádenıet jáne aqparat mınıstrliginiń tapsyrysy boıynsha Ulttyq kınony qoldaý memlekettik ortalyǵynyń qoldaýymen túsirildi.

— Kıno salasyndaǵy memlekettik qoldaý qoǵam úshin ózekti máselelerdi kóteretin jobalardy júzege asyrýǵa baǵyttalǵan. Kınojobalardy konkýrstyq irikteýdiń basym baǵyttarynyń biri — «Zań jáne tártip» qaǵıdaty, ıaǵnı zańǵa qurmetpen qaraýdy qalyptastyrý, ony buzýdyń saldaryn jáne jeke jaýapkershilikti túsiný. «Búrkitshi» fılmi de osy máselelerdi kóterip, zorlyq-zombylyqqa tózbeýshilik qaǵıdatyn qalyptastyrýǵa úndeıdi. Osyndaı áleýmettik mańyzy bar máselelerge kórermenniń nazaryn aýdarýda kınonyń múmkindigi zor, — dedi Ulttyq kınony qoldaý memlekettik ortalyǵynyń basqarma tóraǵasy Qurmanbek Jumaǵalı.

Aıta keteıik, buǵan deıin ShQO turǵyny óz qyzyn birneshe jyl boıy zorlady degen kúdikke ilikkenin jazǵanbyz.

Sonymen birge, áıelder nege zorlyq-zombylyqqa shydaıtynyn Aqtóbedegi mamandar túsindirgen edi.