Áıel kóshbasshylardyń álemdik sammıti Astanada ótýi yqtımal
ASTANA. KAZINFORM — Qazaqstan tarıhta tuńǵysh ret bıznes pen memlekettik basqarý salasyndaǵy áıel kóshbasshylardyń álemdegi eń iri forýmdarynyń biri — Global Summit of Women jıynyn qabyldaýy múmkin. Bul týraly «Kazakh Tourism» UK» AQ baspasóz qyzmeti málim etti.
Ystambulda ótken sammıt qorytyndysy boıynsha halyqaralyq uıymdastyrý komıteti Astanany kelesi shara ótetin oryn retinde qarastyrýdy usyndy. Aıta keteıik, atalǵan jıynda Qazaqstannyń isker áıelder qaýymdastyǵynyń (QІÁQ) delegatsııasy erekshe belsendilik tanytqan bolatyn.
Astananyń Parıj, London, Tokıo, Seýl jáne Madrıd sııaqty álemdik megapolıstermen bir qatarda áleýetti qalalar tizimine enýine elorda ınfraqurylymynyń joǵary daıyndyǵy men Astana Women Summit 2026 forýmynyń sátti ótýi negiz boldy.
— Ulttyq kompanııa retindegi bizdiń basty mindetimiz — sınergııalyq tıimdilik qalyptastyryp, is-sharaǵa kelgen árbir qatysýshynyń elimizde tolyqqandy týrıst retinde ýaqyt ótkizýine jaǵdaı jasaý. Osyndaı bir ǵana demalys kúnderiniń ózi qonaqúılerdi toltyryp, qoǵamdyq tamaqtaný jáne qyzmet kórsetý salasynyń jumysyn jandandyrady, sáıkesinshe qala ekonomıkasyna orasan zor tabys ákeledi, — dep atap ótti «Kazakh Tourism» UK» AQ Basqarma tóraǵasy Talǵat Ǵazızov.
Búgingi tańda elordada bir ýaqytta 18 myńnan astam adamdy qabyldaı alatyn 317 ornalastyrý orny (qonaqúıler, hostelder) jumys isteıdi. 2025 jyly olar kórsetken qyzmetterdiń kólemi 74 mlrd teńgege jetti, bul aldyńǵy kezeńdegi kórsetkishten (65 mlrd teńge) 14%-ǵa joǵary.
Astana Tourism 2026 jyldyń birinshi toqsanynda júrgizgen saýalnama qorytyndysy boıynsha, bir týrıstiń ortasha shyǵyny 309 AQSh dollaryna deıin ósken. Bul elorda qonaqtarynyń týrıstik belsendiligi men tutynýshylyq shyǵyndarynyń artqanyn aıǵaqtaıdy.
Eske sala keteıik, óńirlerdi iri halyqaralyq medıajobalar arqyly keshendi túrde ilgeriletý sheńberinde jyl saıynǵy is-sharalardyń Oqıǵalar kúntizbesin júzege asyrý boıynsha júıeli jumystar júrgizilip jatyr.
Qazirgi ýaqytta kúntizbede josparlanǵan 55 is-sharanyń 16-sy óńirlerde sátti uıymdastyryldy. Bul sharalarǵa kelgen kórermender men qonaqtardyń jalpy sany 150 myńnan asyp jyǵyldy.
Eske sala keteıik, Qazaqstan týrızmin nasıhattaýǵa halyqaralyq blogerler tartyldy.
