Áıel depýtattar parlamentke sharıǵat shálisimen keldi
ASTANA. 2 qarasha. QazAqparat - Túrik parlamentiniń tarıhynda tuńǵysh ret áıel depýtattar májiliske sharıǵat shálisin jamylyp keldi, dep habarlaıdy muslim.kz.
Aıta júrer bul ózgeristi osy eldiń er minezdi kósemi Erejep Taıyp Erdoǵannyń ústimizdegi jyldyń qyrkúıek aıynyń 30-y kúni jarııa etken demokratııalyq reformalardyń jemisi deýge bolady. Demokratııalyq reformalarǵa sáıkes memlekettik mekemelerde áıelderge jaýlyq tartyp júrýine salynǵan tyıymnyń kúshi joıylǵan edi. Atalmysh tyıym Túrik Respýblıkasy bolyp qurylǵan sátten bastap kúshine engen bolatyn.
Eldi eleń etkizgen bul jańalyqty jaqtyrmaı qarsy alǵandar da, jaqtap sóılegender de boldy. Erdoǵannyń ózi men onyń bılik basyndaǵy partııasy bul ózgeristi demokratııa jetistigi retinde baǵalasa, narazy toptar eldiń zaıyrly sıpatyna qaıshy keletinin alǵa tartyp otyr.
Ústimizdegi jyldyń naýryz aıynda Túrkııanyń memlekettik keńesi eldiń joǵary oqý oryndarynda sharıǵat shálisimen júrýge múmkindik beretin jańa zańdy qoldanystan alyp tastaý jóninde sheshim shyǵarǵan edi. Osylaısha, joǵarǵy ákimshilik sot buryn el prezıdenti Abdolla Gúl qol qoıǵan zańnyń júzege asýyna naqty kedergi keltirgen bolatyn
Sharıǵat shálisine qatysty másele talaı daý-damaıǵa túrtki bolǵanyn aıta ketý kerek. Osy jyldyń aqpan aıynda el prezıdenti bılik basyndaǵy Ádilet jáne damý partııasynyń bastamasy boıynsha qabyldanǵan zańdy bekitken edi. Osydan keıin Túrkııanyń joǵary bilim berý jónindegi keńestiń jetekshisi barlyq joǵarǵy oqý oryndarynyń basshylaryna sharıǵat shálisimen júrýge qatysty tyıymnyń kúshin joıýdy tapsyrdy.
El oppozıtsııasy bul zańǵa óre túrkegelip, qarsy shyqty. Túrik oppozıtsııasynyń ókili onyń kúshin joıýdy Konstıtýtsııalyq sottan talap etken edi.
