«Áıel densaýlyǵy - ult densaýlyǵy» - Almatydaǵy dóngelek ústel
ALMATY. 3 maýsym. QazAqparat /Názıra Eleýhan/ - Keleshek urpaqtyń densaýlyǵy myqty bolyp týýy úshin barlyq qoǵamnyń, barlyq azamattardyń óz densaýlyǵyna ortaq jaýapkershiliktiń bolýy mańyzdy. Bul týraly búgin Almatyda ana men bala densaýlyǵyn qorǵaý máselesine arnalǵan dóńgelek ústel otyrysynda aıtyldy.
"Respýblıkalyq áıelder keńesi" qoǵamdyq qorynyń prezıdenti Nına Kaıýpovanyń aıtýynsha, ana men bala densaýlyǵyn qorǵaý otbasy jáne memleket ál-aýqatynyń negizinde jatyr.
"Búgingi kezdesýdiń eń basty maqsaty - qoǵam nazaryn ult densaýlyǵy máselesine aýdartý, ár azamatty óz densaýlyǵyna jaýapkershilikpen qaraýǵa shaqyrý bolyp tabylady. Óıtkeni, deni saý adamnan tiri bala ǵana emes, deni saý urpaq dúnıege keledi",-dep atap ótti ol jıyn barysynda. Onyń aıtýynsha, naqty áleýmettik kepildikter áıel-ananyń otbasynyń uıytqysy retinde róli men bedelin kóterýge yqpal etpek.
Basqosýda ana men bala densaýlyǵyna qatysty máselelermen qatar, kópbalaly otbasylardyń máseleleri, sheshý joldary, medıtsınalyq qyzmet kórsetýdiń suraqtary jáne onyń sapasy da talqylandy.
Jıynǵa qatysýshylardyń pikirinshe salaýatty ómir saltyn ustaný osy máseleniń negizgi kilti bolyp tabylady.
"Ana men balany qoldaý boıynsha maqsatty jumys "Nur Otan" partııasynyń strategııalyq basymdy baǵyttarynyń biri bolyp tabylady. Bul jumystar ár azamattyń ult densaýlyǵy úshin jaýapkershiligine turaqty senimin qalyptastyrýǵa múmkindik beredi",-dedi "Nur Otan" HDP Almaty qalalyq fılıalynyń birinshi orynbasary Mahambet Beıdáli.
