Áıel bosanar kezde kúıeýiniń qoldaýy mańyzdy — akýsher keńesi
ASTANA. KAZINFORM — Búgin Halyqaralyq akýsherler kúni. Soǵan oraı «Búgin LIVE» stýdııasyna akýsher mamany qonaq bolyp, óz salasynyń qyr-syryn túsindirdi.
— Kóbine adamdar akýsher men gınekologti jıi shatastyryp jatady. Bul ekeýiniń jumysy tyǵyz baılanysty bolǵanymen, ekeýi eki túrli qyzmet atqarady. Gınekolog — ol áıeldiń reprodýktıvti júıesiniń aýrýlaryn anyqtap, ony emdep, aldyn alý sharalaryn júrgizýmen aınalysady. Olar ambýlatorııalyq qabyldaý jasaıdy. Al akýsherler júkti áıelge qoldaý kórsetip, bosaný barysynda jáne bosanǵannan keıin kásibı kómektesetin maman, — deıdi Elmıra Nııazbekova.
Maman kúnine 10-12 balanyń dúnıege kelýine kómektesedi eken. Ol ár sábı dúnıege aman-saý kelgen saıyn ózimdi erekshe sezinemin deıdi.
— Bosanyp jatqan áıelge akýsherdiń qoldaýy óte qajet. Sebebi áıel bosanýǵa kelgende qatty ýaıymdap keledi. Sol kezde akýsherler sabyrlyq tanytyp, bosanarda aýyrsynýyn jeńildetýge járdemdesip, mazasyzdyǵyn azaıtady. Men áıelderge daýys kótermeýge tyrysamyn. Sebebi bul áıel men medıtsınalyq qyzmetkerlerdiń arasynda senimdilikti arttyrady. Balany bosandyryp, ony anasynyń ústine jatqyzyp, balanyń shyryldaǵan daýysyn estigen kezde ózińdi keremet bir jaqsylyq jasaǵandaı erekshe sezinesiń, — deıdi akýsher.
Elmıra Nııazbekova bosanýǵa kelgen áıelderge maman retinde aqyl-keńesin aıtty.
— Bosanýǵa keletin áıelder júktilik kezinde daıyndalyp, trenıngterge qatysyp, túrli aqparat alyp, dárigerlermen keńesip kelgeni óte mańyzdy. Daıyn áıel, sabyrly áıel — ol sátti bosanýdyń kepili, — deıdi ol.
Oǵan qosa akýsher bosanyp jatqan áıelge joldasynyń qoldaýy úlken kúsh-qýat syılaıtynyn aıtady.
— Bosaný sátinde qasyńda jaryńnyń bolǵany adamǵa moraldyq turǵydan kóp kómektesedi. Qatty aýyrsyný kezinde áıeldiń nazaryn aýdarýǵa járdemi tıedi. Jalpy jas qyz-kelinshekterdiń úlken jastaǵy áıelderge qaraǵanda bosanýy jeńilirek ótedi. Úlken áıelderdiń súıegi qatyp qalady. Olardyń ózindik qıyndyqtary bar, — deıdi maman.
Aıta keteıik, jaqynda Qostanaıda salmaǵy 7 keli sábı dúnıege keldi.