«Áıel bedelin qalaı arttyrýǵa bolady?» - baspasózge sholý
***
Elbasy Nursultan Nazarbaev 8 Naýryz - Halyqaralyq áıelder kúni merekesine oraı Qazaqstan áıelder qoǵamdastyǵynyń bir top ókilderimen kezdesti. Jyl saıyn dástúrli túrde bolyp kele jatqan «Kóktem shýaǵy» atty osynaý kezdesýde Prezıdent áıelder qaýymyn merekelerimen quttyqtap, olardyń eńbekterine tabystar tiledi. Osy jaıt arqaý bolǵan maqala el gazeti «Egemen Qazaqstanda» «Analar - asyl jandar, shýaq bop shashylǵandar!» degen taqyryppen berildi. sylymnyń jazýynsha, kezdesýge ekonomıkanyń, mádenıettiń, áleýmettik salanyń jáne memlekettik qyzmettiń túrli sektorlarynyń, úkimettik emes uıymdardyń ókilderi qatysty. Óziniń quttyqtaý sózinde Elbasy: «Sizder arqyly men elimizdiń barlyq áıelder qaýymyn quttyqtap, densaýlyq, otbasynda baqyt jáne tatýlyq tileımin. Ekonomıkanyń túrli salalarynda, ásirese, bilim berý, densaýlyq saqtaý, mádenıet pen bızneste jumyspen qamtylǵandardyń 52%-ynan astamyn áıelder quraıdy. Olar depýtattardyń, basshylardyń arasynda da kóp, al memlekettik qyzmetshilerdiń teń jartysynan astamy - áıelder. Osylaısha, olar kóptegen sheshimderdi qabyldaýǵa atsalysady. Sol úshin meniń alǵysymdy qabyl alyńyzdar», - dedi.
Kınosúıer qaýymǵa «Qazaqfılm stýdııasy» bıylǵy prokattyq maýsymdy «Eles qýǵan saıypqyran» atty fantastıkalyq fılmmen ashqanyn biledi. Atalmysh kartınanyń ulttyq kınematografııa úshin jańalyqtary kóp. Qazir úlken ekranda júrgen kartına zamanaýı sheshimderimen, kaskaderlik sheberlikterimen kórermenderin taýyp otyr. Bul fılmge Krıstanna Loken («Termınator-3: Kólikter kóterilisi») jáne Armand Assante («Odısseıa», «Gangster») sııaqty gollıvýdtyq juldyzdardyń túsýge kelisim berýi kezdeısoqtyq emes. Eń bastysy, Santa Monıkada ótken kınorynokta osynaý ekshndy áıel adam túsirgenin bilgende kınoprokatshylar tańdanystaryn jasyrmaǵan. Al stsenarıı avtory ári fılm rejısseri - qazaq qyzy Marına Qonarova bolatyn. Túsirý alańynda «Tıgr» degen laqap atqa ıe bolǵan rejıssermen aradaǵy suhbatty «Egemen Qazaqstan» gazeti búgingi nómirinde «Túsirý alańynda túsiniksiz mıstıkalyq oqıǵalar bola beredi» degen taqyryppen berip otyr. Basylym tilshisiniń ekshn janryna barýǵa ne túrtki boldy degen saýalyna jaýap bergen ol: «Shyndap kelgende, qazaqstandyq kınematografııada taptaýryn bolmaǵan jolǵa túsip kórý úshin osyndaı táýekelge bardyq. Erekshe bir týyndy jasaǵymyz keldi. Kórermenderimizdi tańǵaldyrý úshin jańa tehnologııalardy paıdalana otyryp, fantastıkalyq ekshn túsirýge bel baıladyq jáne osy arqyly álemdik standartqa azdap bolsa da jaqyndamaq edik. Másele mynada, endigi jerde bizdiń fılmderge gollıvýdtyq blokbasterlermen básekege túsýge týra keledi. Qansha degenmen, biz áli de keıbir kınojanrlardy úırenýge umtylyp, sony qadamdar jasaýǵa tyrysyp baǵýdamyz. Osy talpynystarda «Qazaqfılm» ulttyq kınostýdııasy rejısserlerge úlken múmkindikter týdy¬ra bastaǵanyna qýanamyn. Munyń otandyq kınonyń damýynda mańyzy ólsheýsiz», - deıdi. ***
«Aıqyn» gazetiniń búgingi sanynda Qazaqstan isker áıelder qaýymdastyǵynyń tóraıymy Raýshan Sársembaevamen aradaǵy suhbat «Erkekterdi alasartpaı, áıelderdi kótereıik!» degen taqyryppen berilip otyr. Basylym tilshisiniń barlyq saýalyna tushymdy jaýap bergen ol áıelder eń aldymen joldasynyń jary, balalarynyń anasy, odan keıin ǵana kásipker, isker áıel, saıasatker ekenderin umytpaýlary kerektigin basa aıtady. «Árbir áıeldiń óz ómirinde dúnıege bala ákelý, urpaq tárbıeleý, názik te bııazy bolý, aınalasyndaǵylarǵa jylylyq syılaý sekildi erekshe qasıetterdi saqtap qalýy óte mańyzdy. Bul er azamattarǵa buıyrmaǵan baqyt. Esterińizde bolsyn: bizdi er-azamattardan ereksheleıtin qasıetter myqty ete túsedi, bylaısha aıtqanda, bizdiń qýatymyz - álsizdigimizde. Tek bir-birimizge uqsamaıtyndyǵymyzdan, ózindik ereksheligimizdiń arqasynda ǵana bir-birimizge qyzyqtymyz. Eger áıel zaty ózin er azamat sekildi óktem ustap, dóre¬kilikke jol beretin bolsa, qasyndaǵy adamdardyń barlyǵyn qashyryp jiberedi. Sonda ǵana otbasynda bereke bolady», - dedi ol.
«Áıel bedelin qalaı arttyrýǵa bolady?». Dál osy saýalnama «Aıqyn» gazetiniń senbilik sanynda elimizge esimi tanymal birqatar azamattardyń arasynda júrgizilgen. Máselen, osy saýal tóńirigeninde oı bólisken qoǵam qaıratkeri Dos Kóshim er adamnyń mindeti - túzde jumys isteý, aqsha tabý, otbasyn asyraý, áıeldiń mindeti - bala baǵý, oshaq otyn tútetý degen kózqarasyn bildiredi. Al jazýshy Talǵat Aıtbaıuly «Áıeldiń eń basty mindeti - áıel bolý. Eriniń kómekshisi bola bilgen áıel, eliniń de joǵyn joqtap, muńyn muńdaı biledi, qamqorshysy bola alady. Biraq bizdiń qoǵamda áıel qaýymy biz kútkendeı deńgeıden kórine aldy ma? Menińshe, joq. Árıne, bárine birdeı topyraq shashýǵa bolmas. Biraq kóp jaǵdaıda, araq iship, temeki tartyp, jeńil júriske salynyp, bir-birimen julysyp jatatyn názik jandar barshylyq», - deıdi.
