Áıel-balasyn kepilge alyp, týysynyń páterin órtep jibergen: Qaraǵandy turǵyny bir aıda eki qylmys jasady

QARAǴANDY. QazAqparat - Qaraǵandy turǵyny burynǵy áıeli men qyzyn úsh kún tutqynda ustaǵan. Osy is boıynsha tergeýde júrgenine qaramastan týysynyń páterin órtep jibergen. Bul týraly Qaraǵandy oblysynyń PD bastyǵy Sanjar Ádilov halyqpen kezdesý kezinde málimdedi, dep habarlaıdy QazAqparat tilshisi.

Oblystyń bas polıtseıiniń aıtýynsha, er adam qylmysqa barǵanda esirtkige mas bolǵan.

Oqıǵa osy jyldyń sáýir aıynda boldy. Ol buryn birge turǵan áıeli men qyzyn páterde úsh saǵattan astam tutqynda ustap, pyshaqpen qorqytyp otyrǵan.

Qylmyskerdi kelissózden keıin «Arlan» arnaıy bólimshesiniń jaýyngerleri ustady.

Bul fakt boıynsha qylmystyq is tirkelgen. Tergeý áli júrip jatyr.

Biraq ol tergeýde bolǵanyna qaramastan, bir aıdan keıin týysynyń páterin órtep jibergen. Odan úsh adam zardap shekti.

«Búgingi kúni kúdikti qamaýǵa alynǵan. Bul adam buryn urlyq jasaǵany úshin sottalǵan, áli jazasyn ótemegen, probatsııalyq baqylaýda bolǵan. Onyń shartty merzimi bir jarym jylǵa naqty bas bostandyǵynan aıyrýǵa aýystyryldy. Adamdardy kepilge alý faktisi boıynsha QR QK 126 jáne 115 baptary boıynsha tergeý júrip jatyr. Muqııat tergeýden keıin isti sotqa beremiz, oǵan jańa úkim shyǵady. Týystarynyń páterin 26 mamyrda órtegen. Úsh adam zardap shekti, olar aýrýhanaǵa jatqyzyldy», - dedi Qaraǵandy oblysy polıtsııa departamentiniń bastyǵy Sanjar Ádilov.

PD bastyǵynyń aıtýynsha, jyl basynan beri Qaraǵandy oblysynda esirtkige qatysty 142 qylmys tirkelgen. 190 keli esirtki zaty tárkilendi.

Bes esirtki zerthanasynyń qyzmeti áshkerelendi, 23 kg sıntetıkalyq esirtki tárkilendi, esirtki satatyn 350 saıt buǵattaldy.

«Densaýlyq saqtaý basqarmasynyń málimetinshe, oblys boıynsha esirtkige táýeldi 1356 adam esepte tur, onyń ishinde 194 áıel men kámeletke tolmaǵan bir bala bar», - dep tolyqtyrdy Sanjar Ádilov.