«Áıel baqyty» baǵdarlamasy efırge shyǵýyn toqtatady
ASTANA. QazAqparat - Qazaqstan ulttyq arnasyndaǵy «Áıel baqyty» baǵdarlamasy 1 qyrkúıekten bastap efırge shyǵýyn toqtatady, dep habarlaıdy QazAqparat.
Bul týraly baǵdarlama júrgizýshisi Láılá Sultanqyzy áleýmettik jelide málim etti. Júrgizýshi bul sheshimniń arna basshylyǵy men shyǵarmashylyq toptyń ortaq sheshimi aıasynda qabyldanǵanyn jáne baǵdarlamanyń kez kelgen áıel taǵdyryna beı-jaı qaramaǵanyn, el arasynda tanymaldylyq pen joǵary reıtıngke ıe bolǵanyn basa aıtty.
«Tórt jyldyń ishinde «Áıel Baqytynda» 1000-ǵa jýyq efır kórermender júregine jol tartyp, 3000-ǵa jýyq keıipker qatysty. Sońǵy jyldyń ózinde jobanyń arqasynda 40-qa jýyq áıel jumyspen qamtyldy. Júzge jýyq keıipkerge qarjylaı kómek kórsetilip, keıbireýine áli kúnge deıin kómek berilip keldi. 20 ana balasyna sapaly ári zamanaýı medıtsınalyq kómek aldy. Joba aıasynda 10 balaǵa mektep formasy men demalys lagerine joldama berildi. 3 keıipkerimiz tolyǵymen alkogolızmnen aıyqty. 2 áıel jasandy jolmen ana baqytyn sezindi. 50 áıel áleýmettik kómek alyp, óz kásibin ashty. 70 áıel otbasyn saqtap qaldy. «Jar-Jar» aıdary boıynsha 4 jup qosyldy. Bul baǵdarlama arqyly anasy men qyzy 27 jyldan keıin qaýyshty. «Úlgili otbasy» aıdaryna elimizdegi eń berekeli 150 otbasy shaqyrylyp, baqytty bolýdyń syrymen bólisti», - dep jazdy Láılá Sultanqyzy.
